'केवळ मुख्यमंत्रिपदच नाही, पक्षप्रमुखपद सोडण्याचीही माझी तयारी': उद्धव ठाकरे

मुंबई, 22 जून : शिवसेना (Shivsena) आमदारांनी केलेल्या बंडखोरीनंतर मुख्यमंत्री उद्धव ठाकरे (Uddhav Thackeray) यांनी फेसबुक लाईव्हच्या माध्यमातून जनतेशी संवाद साधला. शिवसेनेच्या कोणत्याही आमदाराने मला समोर येऊन सांगावं, मी आत्ता राजीनामा द्यायला तयार आहे. केवळ मुख्यमंत्रीपदच नाही, तर मी शिवसेना पक्षप्रमुखपदाचाही राजीनामा देण्यास तयार आहे, असंही मुख्यमंत्र्यांनी आपल्या भाषणात म्हटलं आहे. "समोर येऊन माझ्याशी संवाद साधा. आज मी माझ्या राजीनाम्याचं पत्र तयार करून ठेवतो. मुख्यमंत्रीपद माझ्याकडे अनपेक्षितपणे आलं. मला या पदाचा अजिबात मोह नाही. मी ओढून ताणून खुर्चीवर बसणार नाही. मी तुम्हाला मुख्यमंत्रीपदी नको, तर मला ते समोर येऊन सांगा. अगदीच संकोच वाटत असेल तर मला एक कॉल करून सांगा, मी हे पद सोडून देईन. एवढंच नाही, तर कोणताही शिवसैनिक माझ्या समोर येऊन म्हणूदे की तुम्ही पक्षप्रमुखपदीही नको, मी तेही सोडायला तयार आहे. मी आता वर्षा सोडून मातोश्रीवर जातो, फक्त माझ्या समोर येऊन बोला", अशी भावनिक साद त्यांनी बंडखोर आमदारांना घातली. बाळासाहेबांनंतरच्या शिवसेनेनं तुम्हाला खूप काही दिलंय- फेसबुक लाईव्ह दरम्यान जनतेशी संवाद साधताना मुख्यमंत्र्यांनी विविध विषयांवर उत्तर दिली. ते म्हणाले की, अनेकजण म्हणतात की ही बाळासाहेबांची शिवसेना राहिली नाही. परंतु शिवसेनेनं हिंदुत्वापासून कधीही फारकत घेतली नाही. 2012 साली बाळासाहेब गेल्यानंतर 2014 साली अतिशय प्रतिकूल परिस्थितीत आपण विधानसभा निवडणूकांना सामोरे गेलो. त्यानंतर शिवसेनेला जे मिळालं, ती बाळासाहेबांनंतरचीच शिवसेना होती. आज शिवसेनेचा मुख्यमंत्री आहे, अनेकजण मंत्री आहेत, हीसुद्धा बाळासाहेबांनंतरचीच शिवसेना आहे, असंही उद्धव ठाकरे म्हणाले. हेही वाचा- बंडखोरांनी सांगावं, राजीनामा देण्यास तयार, वाचा उद्धव ठाकरे यांच्या भाषणातील 10 इमोशनल मुद्दे उद्धव ठाकरेंनी या मुद्द्यांना केला स्पर्श- - हिंदुत्व हा शिवसेना श्वास. शिवसेना आणि हिंदुत्व हे एकमेकांमध्ये गुंफलेलं आहे. हिंदुत्वाबद्दल विधानसभेत बोलणारा मी पहिला मुख्यमंत्री. असं काय केलं की हिंदुत्वापासून दूर गेलो असं वाटलं? आधीही शिवसेना हिंदुत्त्ववादी आताही हिंदुत्ववादीच आहे.