तुमचं जी-मेल अकाउंट तुमच्याशिवाय इतर कोणी वापरत नाही ना? असा घ्या शोध

मुंबई, 22 फेब्रुवारी : आपण एक किंवा त्यापेक्षा जास्त स्मार्टफोन ( smartphones) आणि लॅपटॉप ( laptops), तसंच कॉम्प्युटरवर जी-मेल अकाउंटने (Gmail account) लॉग इन ( log in) करत असतो. अनेक सोशल मीडिया प्लॅटफॉर्मवर ( social media platforms) लॉगिन करण्यासाठीही जी-मेलचा वापर केला जातो. त्यामुळेच तुमचं जी-मेल अकाउंट तुमच्याशिवाय दुसऱ्या एखाद्या व्यक्तीकडून तर वापरलं जात नाही ना, हे जाणून घेणं महत्त्वाचं आहे. ते कसं ओळखायचं, याबाबत आज आम्ही तुम्हाला माहिती देणार आहोत. 'आज तक'ने याबाबतची माहिती प्रसिद्ध केली आहे.

जी-मेल ही जगातली सर्वाधिक वापरली जाणारी ईमेल सेवा आहे. तुमच्यापैकी अनेकांकडे जी-मेल आयडी असेल. भारतात सायबर सिक्युरिटी आणि प्रायव्हसीबद्दल जागरूकता फारच कमी आहे. सर्वसाधारणपणे जी-मेल अकाउंटसोबत इतर अनेक अकाउंट लिंक केलेली असतात. तुम्ही तुमच्या जी-मेलसोबत किती तरी पासवर्ड सिंक ठेवत असता. त्यामुळे तुमचं जी-मेल अकाउंट हॅक झाले, तर तुम्ही खूप अडचणीत येऊ शकता. तुमच्या जी-मेल आयडीवरून अनेक अकाउंट हॅक होऊ शकतात. म्हणूनच जी-मेल अकाउंटची सिक्युरिटी आणि जागरूकता तुमच्यासाठी खूप महत्त्वाची आहे. काही वेळा असं होतं, की दुसरं कोणी तरी तुमचं जी-मेल अकाउंट Access करत असतं; पण खरी समस्या तेव्हा उद्भवते, जेव्हा ते तुम्हाला कळत नाही. आज आम्ही तुम्हाला काही टिप्स देणार आहोत, ज्यांच्या साह्याने तुम्हाला सहज कळेल की तुमचं जी-मेल अकाउंट तुमच्याशिवाय इतर कोणी वापरत तर नाही ना?

हे लक्षात ठेवा

>> तुमच्या गुगल अकाउंटमध्ये जाऊन तुम्ही आतापर्यंत किती डिव्हाइसेसवरून जी-मेल अ‍ॅक्सेस केला आहे, याचा रिव्ह्यू घ्या. त्यानंतर तुमच्या गुगल अकाउंटमध्ये नेव्हिगेशन पॅनेलमधून Security पॅनेलवर जा.

>> Security पॅनेलमध्ये Manage Devices चा ऑप्शन असेल. येथे क्लिक करून, तुम्ही एकाच वेळी किती डिव्हाइसेसवरून लॉग इन केलं आहे, ते तुम्हाला दिसेल. अधिक तपशीलासाठी, तुम्ही लिस्टमधून डिव्हाइस निवडू शकता.

>> तुम्हाला या लिस्टमध्ये असं कोणतंही डिव्हाइस दिसलं, की ज्यातून तुम्ही लॉग इन केलेलं नाही, तर समजून जा, की कोणी तरी तुमचं अकाउंट अ‍ॅक्सेस करत आहे. चांगली गोष्ट म्हणजे तिथून तुम्ही त्या डिव्हाइसमधून साइन आउट करून तुमचा जी-मेल काढून टाकू शकता.

>> तुमचं जी-मेल खातं कुठून लॉग इन केलं जात आहे, हे पाहण्याचा आणखी एक मार्ग आहे. तुमच्याकडे कम्प्युटरवरून जी-मेल लॉगिन असेल, तर जी-मेल फ्रंट पेजवर स्क्रोल करून पेजच्या तळाशी जा.

>> पेजच्या खाली उजव्या बाजूला Last account activity: XX Minutes ago दिसेल. त्याच्या खाली Details वर क्लिक करा. क्लिक केल्यावर, एक नवीन विंडो दिसेल. येथे तुमच्या अकाउंटच्या अ‍ॅक्टिव्हिटीची लिस्ट असेल.

>> सर्वांत वर Concurrent Session Information दिसेल. तिथे ब्राउझरचं नाव आणि लोकेशन आयपी अ‍ॅड्रेस पाहता येईल. त्याच्या खाली एक टेबल दिसेल. तिथे आयपी, लोकेशन आणि लॉगिन तारीख व वेळ असेल.

>> आता तुम्ही काळजीपूर्वक पाहा. तुम्हाला असं वाटत असेल, की तुम्ही जे लॉगिन सेशन पाहत आहात, ते तुम्ही केलेलं नाही, तर समजून जा, की तुमचं जी-मेल अकाउंट इतर कोणी तरी अ‍ॅक्सेस केलं आहे.

>> तुम्ही तिथून साइन आउटदेखील करू शकता. याशिवाय, आयपीच्या मदतीने, कोणत्या लोकेशनहून अ‍ॅक्सेस घेतला आहे, हेदेखील शोधता येतं. लक्षात ठेवा, हॅकर्स आयपी बाउन्स करण्यासाठी वेगवेगळ्या टूल्सचा वापर करतात. त्यामुळे आयपीवरून योग्य ठिकाण जाणून घेणे शक्य होईलच असं नाही.

>> पण तुम्ही जी-मेलच्या Security Check Up ऑप्शनवर टॅप करून अधिक माहिती मिळवू शकता आणि तुमचं अकाउंट सुरक्षित करू शकता.

जी-मेलचा वापर दिवसेंदिवस वाढत आहे. अनेकांना तर कामानिमित्त दररोज जी-मेलचा वापर करावा लागतो. त्यामुळे त्याचा वापर सुरक्षित पद्धतीने कसा करता येईल, याची काळजी घ्यावी. जी-मेल हॅक झालं, तर मोठं नुकसान होऊ शकतं.