गाड्यांची तोडफोड, भाजप कार्यालयावर हल्ले; NIA च्या छापेमारीविरोधात PFI चं हिंसक आंदोलन

मुंबई 23 सप्टेंबर : केंद्रीय तपास यंत्रणा असलेल्या एनआयए आणि महाराष्ट्र एटीएसने राज्यभरात पीएफआय संघटनांच्या वेगवेगळ्या ठिकाणांवर छापेमारी केली आहे. एनआयएने देशभरातील 11 राज्यांमध्ये ही छापेमारी करत 100 जणांना ताब्यात घेतलं. दहशतवाद्यांशी संबंध असल्याच्या आरोपाखाली एनआयएने ही कारवाई केली आहे. एनआयएच्या या कारवाईचा तीव्र निषेध व्यक्त करत पॉप्युलर फ्रंट ऑफ इंडियाने (PFI) केरळमध्ये सकाळपासून संध्याकाळपर्यंत संप पुकारला आहे. यादरम्यान प्रचंड गदारोळ झाल्याचं वृत्त आहे. केरळपासून तमिळनाडूपर्यंत मोठ्या प्रमाणात तोडफोड केली जात आहे. तमिळनाडूतील भाजपच्या कार्यालयावरही हल्ला झाल्याचं सांगण्यात येत आहे.

NIA चा PFI वर 'सर्जिकल स्ट्राईक', प्रकाश आंबेडकर म्हणतात पुरावे द्या, अन्यथा...

कोचीमध्ये सरकारी बसेसला टार्गेट करून तोडफोड करण्यात आली आहे. तसंच तिरुअनंतपुरममध्ये तोडफोड झाल्याच्या बातम्या समोर येत आहेत. एनआयएच्या नेतृत्वाखालील विविध एजन्सींनी कार्यालये, नेत्यांची घरे आणि इतर परिसरांवर टाकलेल्या छाप्यांविरोधात पीएफआय कार्यकर्ते केरळमध्ये निदर्शने करत आहेत. देशातील दहशतवादी कारवायांसाठी कथितपणे निधी पुरवल्याप्रकरणी पीएफआयवर हे छापे टाकण्यात आले होते.

केरळमधील कोल्लम जिल्ह्यातील पल्लिमुक्कू येथे आंदोलकांनी पोलिसांवर हल्ला केला. या हल्ल्यात दोन पोलीस जखमी झाले. दुचाकीवरून आलेल्या आंदोलकांनी हल्ला केला. केरळ पोलिसांनी या घटनेला दुजोरा दिला आहे.

Mumbai ATS NIA : भिवंडीतील 2006 च्या दंगलीतील संशयीत आरोपीच्या घरावर NIA चे छापे, हे साहित्य सापडले

एनआयएच्या छाप्यांविरोधात पीएफआयच्या निषेधादरम्यान हिंसाचाराच्या घटना समोर येत आहेत. कोचीमध्ये केरळ राज्य परिवहन बसवर हल्ला केला गेला. बसची तोडफोड करण्यात आली. एनआयएने गुरुवारी पीएफआयच्या 96 ठिकाणी छापे टाकले होते.

पीएफआयने पुकारलेल्या बंदमध्ये तोडफोड आणि उपद्रव झाल्याच्या बातम्या आहेत. तिरुअनंतपुरममध्ये PFI कामगारांनी वाहनावर हल्ला केला. याशिवाय कोल्लममध्येही बसवर हल्ला करण्यात आला. दरम्यान, तामिळनाडू भाजपने आरोप केला आहे की, कोईम्बतूर येथील कार्यालयाची पीएफआय कार्यकर्त्यांनी तोडफोड केली आहे.