Asani cyclonic update : शेतकऱ्यांना वादळाची भीती, कच्चेच आंबे काढले विक्रीला; या राज्यांमध्ये अलर्ट

नवी दिल्ली, 10 मे : बंगालच्या उपसागरात आलेले ‘असनी’ चक्रीवादळ वायव्य दिशेकडे सरकत असले तरी त्याचा वेग आता कमी झाला आहे. भारतीय हवामान खात्याने आपल्या ताज्या अपडेटमध्ये म्हटले आहे की, चक्रीवादळामुळे 10-13 मे पर्यंत अरुणाचल प्रदेश, आसाम, मेघालय, नागालँड, मणिपूर, मिझोराम, त्रिपुरा, तामिळनाडू आणि केरळमध्ये मुसळधार पावसाची शक्यता आहे. भारतीय हवामान खात्याने या राज्यांमध्ये अलर्ट जारी केला आहे. यापूर्वी, आयएमडीने आपल्या अंदाजात म्हटले होते की, ओडिशा आणि पश्चिम बंगालच्या किनारपट्टी भागात 9 ते 12 मे या कालावधीत पावसाची शक्यता आहे आणि त्या भागात यलो अलर्ट जारी केला होता.

दरम्यान, असानी या तीव्र चक्रीवादळाच्या भीतीने पश्चिम बंगालमधील कृष्णगंज येथील शेतकरी पिकण्याची वाट न पाहता कच्चे आंबा विकत आहेत. कमी पावसामुळे यंदा आंब्याचे उत्पादन अगोदरच तुलनेने कमी झाले आहे. शेतकर्‍यांच्या म्हणण्यानुसार, वादळाचा फटका पिकांना बसला तर आंबा विक्री करता येणार नाही. साधारणपणे येथील शेतकरी 15 ते 16 रुपयांनी आंबा विकतात, पण वादळाचा तडाखा बसला तर निम्माही भाव मिळत नाही.

एका शेतकऱ्याच्या म्हणण्यानुसार, कृष्णगंज ब्लॉकमध्ये वेगवेगळ्या आंब्यांची लागवड केली जाते. त्यापैकी हिमसागर आणि लंगडा प्रसिद्ध आहेत. फजली, गुलाबखास, आम्रपाली आंब्याचीही लागवड केली जाते. हिमसागर आणि लंगडा आंब्यांना चांगली मागणी आहे.

आयएमडी भुवनेश्वर केंद्राचे वरिष्ठ शास्त्रज्ञ उमाशंकर दास यांच्या म्हणण्यानुसार, हे चक्रीवादळ पुढील 48 तासांत कमकुवत होईल, परंतु तरीही अनेक राज्यांमध्ये मुसळधार पावसाची शक्यता आहे. पावसासोबत जोरदार वारेही वाहतील. भारतीय हवामान खात्याने केलेल्या ट्विटनुसार, येत्या तीन दिवसांत पश्चिम बंगाल, बिहार, तामिळनाडू, आंध्र प्रदेश, केरळ, नागालँड, मणिपूर, मिझोराम, त्रिपुरा, आसाम, अरुणाचल प्रदेश, आसाम आणि मेघालयमध्ये तीन दिवस पावसाची शक्यता आहे. खासगी हवामान एजन्सी स्कायमेटने म्हटले आहे की, चक्रीवादळ 'असनी' उत्तर-पश्चिमेकडून पुढे सरकत आहे, त्यामुळे पुढील 24 तासांत उत्तर तामिळनाडू आणि दक्षिण किनारपट्टी आंध्र प्रदेशच्या हवामानात मोठे बदल होतील.

हे वाचा - युवा शेतकऱ्यांसाठी केंद्र सरकारची नवी योजना; पशुपालनासाठी देणार लाखोंचं अनुदान

स्कायमेटच्या मते, पुढील 24 तासांत अंदमान आणि निकोबार बेटे, गंगेचा पश्चिम बंगाल, किनारी ओडिशा, किनारी आंध्र प्रदेश, मणिपूर, मिझोराम, त्रिपुरा, मेघालय, नागालँड, आसाम, अरुणाचल प्रदेश, उप-हिमालय पश्चिम बंगाल, बिहार, झारखंड, अंतर्गत ओडिशा, केरळ, दक्षिण कर्नाटक, रायलसीमा आणि तामिळनाडूमध्ये मुसळधार पावसाची शक्यता आहे. प्रत्येक वेळी चक्रीवादळांना जागतिक हवामान संघटनेकडून (WMO) नाव दिले जाते. 'असनी' चक्रीवादळाचे नाव श्रीलंकेने ठेवले आहे, हा सिंहली भाषेतील शब्द आहे, ज्याचा अर्थ क्रोध किंवा उत्कटता किंवा क्रोध असा होतो.

हे वाचा - फक्त कारलच नाही तर बियांदेखील भरपूर फायदेशीर; काही दिवसात दिसेल फायदा

त्याचबरोबर उत्तर आणि मध्य भारतात उष्णतेचा प्रकोप कायम राहणार आहे. उत्तर प्रदेश, दिल्ली, हरियाणा, मध्य प्रदेश, छत्तीसगड, महाराष्ट्रात उष्णतेची लाट राहील. बिहार आणि झारखंडमध्ये, बंगालच्या उपसागरात असनी चक्रीवादळाचा काही प्रभाव असू शकतो आणि काही भागात जोरदार वादळासह पाऊस पडू शकतो. हवामान खात्याच्या म्हणण्यानुसार, 11 मे पासून हवामानात बदल होणार असून उत्तर प्रदेशातील काही जिल्ह्यांमध्ये रिमझिम पाऊस पडण्याची शक्यता आहे.