नाईंकांनंतर आनंद दिघे, दिघेंनंतर शिंदे.. आता कोण होणार ठाण्यातील शिवसेनेचा पालनहार?

प्रतिनिधी - अजित मांढरे ठाणे, 21 जून : शिवसेनेचे नेते आणि कॅबिनेट मंत्री एकनाथ शिंदे (eknath shinde) यांनी बंड पुकारल्यामुळे शिवसेनेला (shivsena) मोठा धक्का बसला आहे. कारण, एकनाथ शिंदे यांची बंडखोरी शिवसेनेला परवडणारी नाही. ज्या ठाणे जिल्ह्याचे प्रतिनिधित्व शिंदे करत आहेत, तो शिवसेनेचा बालेकिल्ला समजला जातो. या जिल्ह्यातील सर्व आमदारांचा शिंदे यांना पाठींबा आहे. त्यामुळे शिंदे गेले तर ठाणे जिल्ह्याचं काय होईल? असा प्रश्न उपस्थित होत आहे. मात्र, ठाणे जिल्ह्याला बंडखोराचाच इतिहास आहे. चला यानिमित्ताने यावर प्रकाश टाकू. ठाणे आणि शिंदे समीकरण.. रिक्षाचालक ते शिवसेना गटनेते असा एकनाथ शिंदेचा राजकीय प्रवास थक्क करणारा आहे. आनंद दिघे यांच्या अपघाती मृत्यूनंतर जिल्ह्यात शिवसेना संपल्याचे चित्र असताना एकनाथ शिंदे यांनी शिवसेनेचे जिल्हाप्रमुख या नात्याने शिवसेना एकसंध ठेऊन मजबूत केली. यामुळे 2017 साली झालेल्या महापालिका निवडणुकीत शिवसेनेची प्रथमच एकहाती सत्ता आली. तसेच, शिंदे यांच्या नेतृत्वाखाली कल्याण-डोंबिवली महापालिका, उल्हासनगर महापालिका, भिवंडी महापालिका, अंबरनाथ नगरपरिषद, बदलापूर नगरपरिषद अशा सर्व ठिकाणी शिवसेनेला सत्ता मिळवण्यात हातभार लागला. राज्यातील विधानसभा निवडणुकीतही एकनाथ शिंदे यांची मोठी भूमिका आहे. यामुळेच शिवसेनेच्या विधिमंडळ गटनेतेपदाची माळ एकनाथ शिंदे यांच्या गळ्यात पडली. यानंतर एकनाथ शिंदे यांचे पक्षातील वजन वाढले. Eknath Shinde : एकनाथ शिंदे भाजपसोबत जाणार? फडणवीस यांचे निकटवर्तीय आमदार सुरतच्या हॉटेलमध्ये, एकनाथ शिंदेंची घेतली भेट ठाण्यात शिवसेनेतील बंडखोरी इतिहास याआधी माजी शिवसेना जिल्हा प्रमुख आणि मंत्री गणेश नाईक यांनी शिवसेना सोडली. तेव्हा शिवसेनेची वाताहत होईल असं वाटलं होतं. पण, आनंद दिघे आले त्यांनी शिवसेना कैक पटीने ठाणे जिल्ह्यात वाढवली. आनंद दिघे यांनी थेट शिवसेनेचे दुसरे मुख्य हेड क्वाटर ठाणे बनवले होते. राज्याच्या कानाकोपऱ्यातून शिवसैनिक ठाण्यात येवू लागले. आनंद दिघे यांच्या निधनानंतर एकनाथ शिंदे आले आणि थेट सत्तेत ठाण्याचा शिवसैनिक सहभागी झाला. आता याच एकनाथ शिंदे यांनी बंड केलं आहे. त्यामुळे ठाण्यात शिवसेना पुन्हा जोमाने उभी करणार कोण? अशी चर्चा आता ठाण्यात सुरु झाली आहे. आनंद दिघे यांच्यामुळे राजकारणात.. शिवसेनाप्रमुख बाळासाहेब ठाकरे आणि सेनेचे ठाणे जिल्हाप्रमुख आनंद दिघे यांच्यामुळे प्रभावित होऊन 1980 च्या दशकात शिवसेनेच्या माध्यमातून राजकारणात प्रवेश केला. सुरुवातीच्या काळात एकनाथ शिंदे हे रिक्षा चालवून उदरर्निवाह करत होते. 1984 साली किसननगर येथे शाखाप्रमुख म्हणून नियुक्ती झाली. सीमा आंदोलनात तुरुंगवास झाला. 1997 मध्ये पहिल्यांदा ठाणे महानगरपालिकेत नगरसेवक म्हणून निवड झाली. 2001 मध्ये सभागृहनेतेपदी निवड झाली होती. सलग तीन वर्षे पद सांभाळले. 2004 मध्ये तत्कालीन ठाणे विधानसभा मतदारसंघातून पहिल्यांदा आमदार झाले. 2005 साली शिवसेनेचे ठाण्याच्या जिल्हाप्रमुखपदी नियुक्ती झाली. 2009 मध्ये मतदारसंघांची पुनर्रचना झाल्यानंतर कोपरी-पांचपाखाडी मतदारसंघातून पुन्हा आमदार झाले. 2014 साली विधानसभेसाठी विजयाची हॅटट्रिक केली. विरोधी पक्षनेतेपदी निवड झाली. डिसेंबर 2014 मध्ये कॅबिनेट मंत्रिपदाची शपथ घेतली.

• Follow us on