)
मुंबई, 29 डिसेंबर : मुंबई महापालिकेतील शिवसेनेच्या कार्यालयाचा बुधवारी शिंदे गटाने ताबा घेतला. यावरून दोन्ही गट आमने-सामने आले. यामुळे तणावाचं वातावरण निर्माण झालं. या पार्श्वभूमीवर आज महापालिका आयुक्तांच्या आदेशानं महापालिकेत असलेली सर्वच पक्षांची कार्यालयं सील करण्यात आली आहेत. शिवसेनेचे कार्यालय सील करण्यात आल्यानं ठाकरे गट आक्रमक झाला आहे. सील करण्यात आलेलं कार्यालय पुन्हा सुरू करण्यात यावं, अशी मागणी ठाकरे गटाकडून होत आहे. ठाकरे गटाच्या माजी नगरसेवकांकडून आंदोलनाला सुरुवात झाली आहे. या सर्व प्रकारावर शिवसेना नेते संजय राऊत यांनी संताप व्यक्त करत शिंदे गटावर जोरदार हल्लाबोल केला आहे. नेमकं काय म्हटलं संजय राऊत यांनी? मुंबई महापालिकेतील शिवसेनेचं कार्यालय सील करण्यत आल्यानं संजय राऊत आक्रमक झाले आहेत. त्यांनी शिंदे गटावर जोरदार हल्लाबोल केला आहे. शिवसेना कार्यालयात घुसखोरी होत आहे. शिवसेनेच्या कार्यालयामध्ये घुसखोरांची एक टोळी घुसली आहे. मनपा कार्यालय कोणाच्या आदेशाने आणि कोणत्या नियमानं सील केलं? असा सवाल करतानाच हा लोकशाहीचा खून असल्याचा घणाघात संजय रायऊत यांनी केला आहे. याला कायद्याचं राज्य म्हणत नाहीत असंही राऊत यांनी म्हटलं आहे. हेही वाचा : लहानपणी मी संघाच्या शाखेत गेलो होतो; एकनाथ शिंदेंनी सांगितली ‘ती’ आठवण मुख्यमंत्र्यांना खोचक टोला दरम्यान आज मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी नागपूरमध्ये संघाच्या मुख्यालयाला भेट दिली. यावरून संजय राऊत यांनी मुख्यमंत्र्यांना खोचक टोला टोला लगावला आहे. रेशीमबागला जाणं चुकीचं नाही, हिंदुत्त्ववादी विचारांची संघटना आहे. मुख्यमंत्री व उपमुख्यमंत्री जोड्यानं जात असतील तर आनंद आहे. काही दिवसांनी ते सभागृहात खाकी पॅन्ट घालून आले तरी मी त्यांचं स्वागत करेल, असा खोचक टोला राऊत यांनी मुख्यमंत्री एकनाथ शिंदे यांना लगावला आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
