विद्यार्थ्यांनो सावधान! रेल्वेत नोकरीचे आमिष, सांगलीतील तरुणांना तब्बल 60 लाखांचा गंडा

सांगली, 17 डिसेंबर : राज्यात दिवसेंदिवस गुन्हेगारीच्या घटना घडत आहेत. नोकरीचे आमिष देऊन आर्थिक फसवणुकीचेही प्रकार समोर येत आहेत. यातच आता सांगली जिल्ह्यात एक धक्कादायक प्रकार समोर आला आहे. रेल्वेमध्ये नोकरी देण्याच्या आमिषाने तब्बल 58 लाख 75 रुपयांची आर्थिक फसवणुक केल्याची घटना उघडकीस आली आहे. या घटनेनंतर मोठी खळबळ उडाली आहे.

खानापूर, आटपाडी, वाळवा तालुक्यांतील चार तरुणांना रेल्वेमध्ये नोकरी देण्याच्या आमिषाने गंडा घालण्यात आला. याप्रकरणी खानापूर तालुक्यातील बालाजी भीमराव देवकर (वय 65) या गलाई व्यावसायिकाला अटक करण्यात आली आहे.

गलाई व्यावसायिक बालाजी देवकर (रा. वेजेगाव) याने रेल्वेमध्ये ग्रुप सी पदाकरिता नोकरी लावण्यासाठी भिकवडी बुद्रुक येथील प्रवीण विलास खुपकर या तरुणास आमिष दाखवले. यानंतर त्याने प्रत्येकी 15 लाखांची मागणी केली. त्यामुळे रेल्वेतील नोकरीच्या आमिषाने प्रवीण खुपकर यांनी 13 लाख 75 हजार रुपये ठकसेन देवकर नावाच्या व्यक्तीला दिले.

तर यासोबपतच रेल्वेत नोकरी मिळत असल्याचे खुपकरचे मित्र महावीर विलास पोकळे (रा. जांभुळणी, ता. आटपाडी), महेंद्र चंद्रकांत नलवडे (रा. वलखड, ता. खानापूर) आणि सुनील अर्जुन पवार (रा. किल्ले मच्छिंद्रगड, ता. वाळवा) यांना समजले. त्यामुळे त्यांनीही देवकरची भेट घेतली. त्यावेळी देवकर याने त्या तिघांनाही रेल्वेत सी ग्रुपपदी नोकरी लावण्याचे आमिष दिले. तसेच देवकरने त्यांच्याकडून प्रत्येकी 15 लाख रुपये घेतले.

हेही वाचा - बायकोसोबत वादानंतर पतीने चिमुकल्याला तिसऱ्या मजल्यावरून फेकलं, नंतर स्वत:ही मारली उडी

पैसे घेतल्यावर काय केले -

यानुसार, त्याने चौघांकडून तब्बल 58 लाख 75 हजार रुपये उकळले. पैसे घेतल्यावर देवकरने भारतीय रेल्वे आणि भारत सरकारचे बनावट शिक्के आणि बनावट कागदपत्रे तयार करून चौघांना थेट रेल्वे भरतीचे नियुक्तीपत्रही दिले. मात्र, नोकरभरतीत फसवणूक झाल्याचे या तरुणांच्या लक्षात आले. यानंतर याप्रकरणी या तरुणांनी देवकरला जाब विचारला तसेच पैसे परत देण्याची मागणी केली. मात्र, पैसे परत देण्यास त्याच्याकडून टाळाटाळ केली जात होती. त्यामुळे प्रवीण खुपकर याने विटा पोलिसांत फिर्याद दिली. याप्रकरणी खानापूर तालुक्यातील बालाजी भीमराव देवकर (वय 65) या गलाई व्यावसायिकाला अटक करण्यात आली आहे. पोलीस पुढील तपास करत आहेत.