रिक्षाचालक ते 3 हेलिकॉप्टर! भाड्याचं घर ते अलिशान महाल.. अविनाश भोसले यांचा थक्क करणारा प्रवास!

मुंबई, 26 मे : पुण्यातील प्रसिद्ध उद्योजक अविनाश भोसले (Avinash Bhosle) यांना सीबीआयने अटक केल्याची माहिती समोर आली आहे. अविनाश भोसले हे पुण्यातील बांधकाम व्यावसायिक आणि एबीआयएल ग्रुपचे मालक आहेत. भोसले हे नाव महाराष्ट्रात नेहमीच वादग्रस्त ठरलंय. कधी जलसंपदा विभागातील कोट्यावधी रुपयांच्या कंत्राटांसाठी, तर कधी सर्वपक्षीय राजकारण्यांशी असलेल्या घनिष्ठ संबंधांसाठी. एकेकाळी पुण्याच्या रस्त्यांवर ऑटोरिक्षा चालवणारा माणूस ते स्वतःच्या मालकीची तीन हेलिकॉप्टर खरेदी करण्यापर्यंत त्यांचा प्रवास कोणालाही थक्क करणारा आहे. अहमदनगर जिल्ह्यातील संगमनेर शहरातून अविनाश भोसले रोजगाराच्या शोधात पुण्यात आले होते. कुठेच नोकरी न मिळाल्याने त्यांनी रिक्षा चालवण्याचा निर्णय घेतला. पुण्यातील रास्ता पेठ भागात भाड्याच्या घरात राहून अविनाश भोसले यांनी रिक्षा व्यवसाय सुरू केला. पुढे ते रिक्षा भाड्यानं चालवण्यासाठी देऊ लागले. पुढे अविनाश भोसले यांची ओळख बांधकाम क्षेत्रातील व्यक्तींशी आणि राज्याच्या सार्वजनिक बांधकाम विभागात ठेकेदारीच्या माध्यमातून काम करणाऱ्यांशी झाली आणि अविनाश भोसले रस्ते तयार करण्याची लहान-मोठी कंत्राटं घेऊ लागले. पुढे सासर्‍यांच्या माध्यमातून त्यांना अधिक मोठी काम मिळायला लागली. युती सरकारच्या काळात खरी भरभराट पश्चिम महाराष्ट्रातील दुष्काळग्रस्त भाग ओलिताखाली आणण्यासाठी युती सरकारने कृष्णा खोरे विकास महामंडळाची स्थापना केली. या महामंडळाच्या माध्यमातून कोट्यावधी रुपयांच्या कामांना सुरुवात झाली. तोपर्यंत जलसंपदा विभागातील काम करण्यासाठी आंध्र प्रदेशातील कंत्राटदारांना पसंती दिली जायची. मात्र, अविनाश भोसले यांच्या या विभागातील प्रवेशाच्या माध्यमातून एक मराठी कंत्राटदार पुढे आणला गेला. सर्वच राजकीय पक्षातील नेत्यांची जवळीक साधण्याचं आणि पुढे ती वाढवण्याचं कौशल्य अविनाश भोसले यांच्या कामी आलं आणि त्यांची आर्थिक भरभराट वेगाने सुरू झाली.

ईडीकडून सलग 13 तासांच्या चौकशीनंतर अनिल परबांची पहिली प्रतिक्रिया, कोणकोणते प्रश्न विचारले?

1999 ला युती सरकार जाऊन काँग्रेस आणि राष्ट्रवादी काँग्रेसचं आघाडी सरकार राज्यात सत्तारूढ झालं. अविनाश भोसले यांनी नव्या सत्ताधाऱ्यांशी देखील तेवढच जुळवून घेतलं आणि त्यांची आर्थिक घोडदौड तशीच पुढे सुरूच राहिली. एकीकडे महाराष्ट्रातील सिंचन प्रकल्प कोट्यावधी रुपयांचा खर्च केल्यानंतर देखील वर्षानुवर्ष रखडत होते तर दुसरीकडे अविनाश भोसले यांची संपत्ती डोळे विस्फारणाऱ्या वेगाने वाढत होती. पुण्यातील बाणेर भागात अविनाश भोसले यांनी उभारलेलं व्हाईट हाऊस थोड्याच कालावधीत चर्चेचा विषय बनलं. या व्हाईट हाऊसच्या समोर अविनाश भोसलेंच्या मालकीच तीन हेलिकॉप्टर उभी राहिली. अवघ्या काही वर्षांमध्ये रिक्षा व्यवसाय ते स्वतःच्या मालकीची हेलिकॉप्टर इथपर्यंतचा झालेला अविनाश भोसले यांचा प्रवास अचंबित करणारा होता. पहिल्यांदा अटक अविनाश भोसले यांच्या या वेगवान प्रवासाला ब्रेक लागला तो 2007 साली. जेव्हा मुंबई एअरपोर्टवरती त्यांना कस्टम विभागाकडून अटक करण्यात आली. लंडनहून येताना आणलेल्या महागड्या वस्तू आणि परदेशी चलन अविनाश भोसलेंनी कस्टम ड्युटी चुकवुन एअरपोर्टच्या बाहेर नेण्याचा प्रयत्न केल्याचा त्यांचावर आरोप होता. मात्र, पुढे या प्रकरणात फारशी चौकशी झाली नाही आणि सर्वपक्षी आणि त्यांची असलेल्या संबंधांमुळे अविनाश भोसले यांचा प्रवास पुढे सुरू राहिला. हॉटेल व्यवसायात प्रवेश नंतर जलसंपदा विभागातील ठेकेदारी कमी करून बांधकाम क्षेत्र, रस्ते आणि पूल उभारणी, हॉटेल व्यवसाय याकडे मोर्चा वळवला. पुण्यातील कोरेगाव पार्क भागात त्यांनी उभारलेल्या हॉटेलच्या उद्घाटनाला त्या वेळचे महाराष्ट्राचे मुख्यमंत्री विलासराव देशमुख, शरद पवार, गोपीनाथ मुंडे, पतंगराव कदम आणि त्यावेळेचे देशाचे गृहमंत्री सुशीलकुमार शिंदे यांच्यासह अनेक बडे नेते उपस्थित राहिले. अविनाश भोसले यांच्या या प्रवासात राजकीय नेत्यांची त्यांची असलेली जवळीक ही अनेकदा दिसून आली. शिवसेनाप्रमुख बाळासाहेब ठाकरे जेव्हा पुण्यात यायचे तेव्हा अविनाश भोसले स्वतःची गाडी घेऊन बाळासाहेब ठाकरे यांचे सारथ्य करायचे. शिवाय बाळासाहेब ठाकरे महाबळेश्वरला अनेकदा अविनाश भोसले यांच्या बंगल्या मध्ये मुक्कामाला देखील राहिलेत. उद्धव ठाकरे यांनी आषाढी वारीची फोटोग्राफी करताना ज्या हेलिकॉप्टर चा उपयोग केला ते हेलिकॉप्टर देखील अविनाश भोसले यांच्या मालकीचं होतं आणि त्यासाठी उद्धव ठाकरे यांनी पाहावा विठ्ठल या त्यांच्या पुस्तकामध्ये अविनाश भोसले यांचे आभारही मानलेत.

भाजपविरोधाच्या तिसऱ्या आघाडीत शरद पवार नाहीत? देशातल्या राजकीय घडामोडींना वेग

इन्कमटॅक्स विभागाचा छापा 2017 साली इन्कमटॅक्स विभागाने अविनाश भोसले यांच्या घरी छापा टाकल्यानंतर ते पुन्हा चर्चेत आले होते. यावेळी ईडीने अविनाश भोसले यांना 2007 साली त्यांच्यावरती कस्टम विभागाकडून ज्या फेमा कायद्यांतर्गत कारवाई करण्यात आली होती, त्या प्रकरणासंबंधी माहिती घेण्यासाठी चौकशीला बोलावल्याचा सांगण्यात आलं होतं.