लता मंगशेकर पुरस्कार सोहळ्यासाठी मोदी मुंबईत, कार्यक्रमाला मुख्यमंत्री उद्धव ठाकरे उपस्थित राहणार नाहीत?

मुंबई, 24 एप्रिल : मास्टर दीनानाथ मंगेशकर स्मृती प्रतिष्ठानचा पहिला लता मंगेशकर पुरस्कार (Lata Deenanath Mangeshkar award) देशाचे पंतप्रधान नरेंद्र मोदी (PM Narendra Modi) यांना जाहीर झाला आहे हा पुरस्कार सोहळा आज म्हणजेच 24 एप्रिल रोजी मुंबईत पार पडणार आहे. या कार्यक्रमासाठी थोड्याच वेळात पंतप्रधान नरेंद्र मोदी मुंबईत दाखल होणार आहेत. या कार्यक्रमात पंतप्रधान नरेंद्र मोदी, मुख्यमंत्री उद्धव ठाकरे आणि मनसे अध्यक्ष राज ठाकरे (Raj Thackeray) हे एकत्र व्यासपीठावर येणार असल्याची माहिती समोर आली होती. पण आता एक मोठी बातमी समोर आली आहे. मुख्यमंत्री उद्धव ठाकरे आज होणार्या लता मंगेशकर पुरस्कार सोहळ्यास गैरहजर राहण्याची शक्यता आहे. पंतप्रधान नरेंद्र मोदी यांना आज संध्याकाळी लता मंगेशकर पुरस्काराने सन्मानित करण्यात येणार आहे. या पुरस्कार सोहळ्यास मुख्यमंत्री उद्धव ठाकरे अनुपस्थित रहाण्याची शक्यता वरिष्ठ सूत्रांनी व्यक्तं केली आहे. वाचा :  पंतप्रधान नरेंद्र मोदी, मुख्यमंत्री उद्धव ठाकरे आणि राज ठाकरे एकत्र येणार गेली दोन दिवस मुंबईतल्या रस्त्यांवर शिवसेना विरुद्ध भाजप असा संघर्ष पहायला मिळतोय. यावेळी शिवसैनिकांनी मातोश्री आणि ठाकरे कुटुंबाच्या संरक्षण आणि सन्मानासाठी जीवाची बाजी लावून दिवस रात्र आंदोलनं आणि निदर्शने केली. या शिवसैनिकांच्या संघर्षाचा अपमान होऊ नये यासाठी मुख्यमंत्री उद्धव ठाकरे हे पंतप्रधान नरेंद्र मोदी आणि विरोधी पक्ष नेते देवेंद्र फडणवीस यांच्यासोबत एकाच व्यासपीठावर न जाण्याचा निर्णय घेणार असल्याची माहिती मिळतेय. तसेच लता मंगेशकर पुरस्कार सोहळा हा एक खासगी कार्यक्रम आहे सरकारी कार्यक्रम नाही आहे. त्यामुळे या पुरस्कार सोहळ्यास राज शिष्टाचाराचे बंधनही नसल्याची माहिती मिळतेय. मास्टर दीनानाथ मंगेशकर स्मृती प्रतिष्ठानचा पहिला लता मंगेशकर पुरस्कार देशाचे पंतप्रधान नरेंद्र मोदी यांना जाहीर झाला आहे. दीनानाथ मंगेशकर प्रतिष्ठान, पुणे, हा एक नोंदणीकृत सार्वजनिक चॅरिटेबल ट्रस्ट असून मंगेशकर कुटुंबीयांनी 32 वर्षांपूर्वी स्थापन केला आहे. प्रतिष्ठानतर्फे संगीत, नाटक, कला, वैद्यकीय व्यावसायिक आणि सामाजिक कार्य क्षेत्रातील दिग्गजांचा सत्कार केला जातो. यंदाचा पुरस्कार वितरण सोहळा रविवार 24 एप्रिल 2022 रोजी मुंबईतील श्री षण्मुखानंद हॉल, येथे आयोजित करण्यात आला आहे. दीनानाथ मंगेशकर यांचा 24 एप्रिल हा स्मृतीदिन असून त्यानिमित्ताने या पुरस्कारांचे आयोजन करण्यात आले आहे. वाचा :  मनसे अध्यक्ष राज ठाकरेंच्या भूमिकेला गुजराती समाजाचा पाठिंबा, समर्थनार्थ लावले बॅनर्स या वर्षी 6 फेब्रुवारी रोजी भारतरत्न लता दीदींच्या निधनाने आमच्या कुटुंबावर सर्वात मोठा दुःखद प्रसंग कोसळला. कुटुंब आणि ट्रस्ट (कुटुंबातील सर्व सदस्य प्रतिष्ठानचे विश्वस्त आहेत). प्रतिष्ठानने भारतरत्न लता दीदींच्या स्मरणार्थ आणि स्मृतीप्रित्यर्थ यावर्षीपासून पुरस्कार देण्याचे ठरवले आहे. हा पुरस्कार “लता दीनानाथ मंगेशकर पुरस्कार” म्हणून ओळखला जाईल, आणि दरवर्षी दीनानाथजींच्या स्मृतीदिनी म्हणजे 24 एप्रिल रोजी प्रदान केला जाणार आहे. यंदा मास्टर दीनानाथजींचा 80 वा स्मृती दिन आहे. त्यानिमित्त “लता दीनानाथ मंगेशकर पुरस्कार” ची घोषणा करण्यात आली. हा पुरस्कार दरवर्षी देशासाठी, लोकांसाठी आणि समाजासाठी अतुलनीय, नेत्रदीपक आणि अनुकरणीय योगदान देणाऱ्या फक्त एकाच व्यक्तीला दिला जाईल. हा पहिला पुरस्कार भारताचे पंतप्रधान नरेंद्र मोदी यांना जाहीर करण्यात आला आहे. उषा मंगेशकर या समारंभाच्या अध्यक्षस्थानी असतील आणि त्यांच्या हस्ते पुरस्कार विजेत्यांना पारितोषिक देऊन गौरविण्यात येईल. पुरस्कार प्राप्त नामवंतांची यादी 1 लता दीनानाथ मंगेशकर पुरस्कार- माननीय नरेंद्र मोदी (विशेष वैयक्तिक पुरस्कार) 2 मास्टर दीनानाथ पुरस्कार- राहुल देशपांडे (भारतीय संगीत) 3 मास्टर दीनानाथ पुरस्कार- (विशेष पुरस्कार) आशा पारेख (चित्रपट क्षेत्रात समर्पित सेवा) 4 मास्टर दीनानाथ पुरस्कार- (विषेश पुरस्कार) जॅकी श्रॉफ (चित्रपट क्षेत्रात समर्पित सेवा) 5 मास्टर दीनानाथ पुरस्कार- (आनंदमयी पुरस्कार) मुंबईचे डबेवाले (नूतन मुंबई टिफिन बॉक्स सप्लायर्स चॅरिटी ट्रस्ट) समाजसेवेच्या क्षेत्रात समर्पित सेवा. 6 सर्वोत्कृष्ट नाटक पुरस्कार- संज्या छाया यंदाचा पुरस्कार सोहळा संध्याकाळी 6 ते 6.15 दरम्यान सुरु होईल. 7.45 ते 8 मध्यंतर असेल. रात्री 8 वाजता “स्वरलतांजली” या संगीत कार्यक्रमाचे आयोजन करण्यात आलं आहे. सुप्रसिद्ध गायक रूपकुमार राठोड यांच्याद्वारे हा कार्यक्रम आयोजित केले जाणार आहे. या कार्यक्रमात आपल्या लाडक्या माननीय लता दीदींच्या अमर सुरांना आणि आठवणींना श्रद्धांजली अर्पण करण्यात येईल. रूप कुमार राठोड, हरिहरन, आर्या आंबेकर, रीवा राठोड, प्रियांका बर्वे, मधुरा दातार आणि विभावरी आपटे या आपल्या मधुर संगीतांनी लतादीदींची गाणी सादर करणार आहेत. हा संगीत कार्यक्रम हृदयेश आर्ट्स, 80 वी मास्टर दीनानाथ मंगेशकर पुण्यतिथी आणि मास्टर दीनानाथ मंगेशकर स्मृती प्रतिष्ठान यांच्या संयुक्त विद्यमाने आयोजित करण्यात आला आहे.

• Follow us on