देवेंद्र फडणवीसांना उपमुख्यमंत्रीपद मिळाले, पण... रवी राणांची खदखद बाहेर

अमरावती, 21 ऑगस्ट : महाराष्ट्रामध्ये झालेल्या सत्तांतरानंतर एकनाथ शिंदे (CM Eknath Shinde) मुख्यमंत्री तर देवेंद्र फडणवीस (Devendra Fadnavis) उपमुख्यमंत्री झाले. फडणवीस उपमुख्यमंत्री झाल्यामुळे अनेकांना धक्का बसला, तर काहींनी नाराजीही व्यक्त केली. अपक्ष आमदार रवी राणा (Ravi Rana) यांनी त्यांच्या दहीहंडीच्या कार्यक्रमात फडणवीस यांना उपमुख्यमंत्रीपद मिळाल्याबद्दल प्रतिक्रिया दिली. देवेंद्र फडणवीस यांच्यासाठी आम्ही खूप मेहनत घेतली, पण त्यांना उपमुख्यमंत्रीपद मिळालं. फडणवीस यांना उपमुख्यमंत्री म्हणायची सवय नाही, असं दु:ख रवी राणा यांनी बोलून दाखवलं. तसंच 2024 साली देवेंद्र फडणवीस यांना मुख्यमंत्री करणार असल्याचं वक्तव्यही राणा यांनी केलं. याआधी भाजपचे तत्कालिन प्रदेशाध्यक्ष चंद्रकांत पाटील यांनीही भाजपने मनावर दगड ठेवून एकनाथ शिंदे यांना मुख्यमंत्री केल्याचं वक्तव्य केलं होतं. चंद्रकांत पाटील यांच्या या वक्तव्यामुळे तेव्हाही वाद निर्माण झाला होता. राणा दाम्पत्य लवकरच भाजपमध्ये? दरम्यान अमरावतीचा पुढचा खासदार आणि बनेऱ्याचा आमदार भाजपचा असेल, असं सूचक वक्तव्य भाजप प्रदेशाध्यक्ष चंद्रशेखर बावनकुळे (Chandrashekhar Bawankule) यांनी याच कार्यक्रमात केलं. बावनकुळे यांच्या या वक्तव्यामुळे नवनीत राणा आणि रवी राणा लवकरच भाजपमध्ये प्रवेश करणार असल्याचे संकेत मिळाले आहेत. रवी राणा या अमरावतीच्या खासदार तर रवी राणा बडनेऱ्याचे आमदार आहेत. राणा दाम्पत्य भाजपमध्ये गेलं तर शिंदे गटात गेलेल्या शिवसेनेच्या आनंदराव अडसूळ (Anandrao Adsul) यांची अडचण होऊ शकते. 2019 लोकसभा निवडणुकीमध्ये नवनीत राणा यांनी आनंदराव अडसूळ यांचा पराभव केला होता. त्यावेळी नवनीत राणा काँग्रेस-राष्ट्रवादी पुरस्कृत उमेदवार होत्या. राणांचा कडूंवर निशाणा दरम्यान या कार्यक्रमातून रवी राणा यांनी बच्चू कडू यांना टोला लगावला. मंत्रिपद मिळावं म्हणून दबाव आणणार नाही किंवा गुवाहाटीला जाणार नाही. मंत्रिपद मिळो अथवा न मिळो मी कायम देवेंद्र फडणवीस यांच्यासोबत शिपाई बनून राहीन, असं रवी राणा म्हणाले. राणांचं शक्तीप्रदर्शन राणा दाम्पत्याने अमरावतीमध्ये दहीहंडीचं आयोजन करून जोरदार शक्तीप्रदर्शन केलं आहे. राणा दाम्पत्याच्या या दहीहंडी कार्यक्रमाला उपमुख्यमंत्री देवेंद्र फडणवीस यांनीही हजेरी लावली. या कार्यक्रमात देवेंद्र फडणवीस यांची रक्ततुला करण्यात आली. मंचावर सिने अभिनेता गोविंदा, भाजप प्रदेशाध्यक्ष चंद्रशेखर बावनकुळे, नवनीत राणा, अनिल बोंडे, रामदास तडस उपस्थित होते.

• Follow us on