राष्ट्रवादीसाठी झारखंडमधून आनंदाची बातमी, विधानसभेत घड्याळाची टिकटिक

रांची, 23 डिसेंबर : झारखंड विधानसभा निवडणुकीची मतमोजणी सुरू असून या राज्यात काँग्रेस आणि जेएमएम आघाडी बहुमताच्या दिशेने वाटचाल करत आहे. त्यामुळे सध्या तिथं सत्तेत असणाऱ्या भाजपला चांगलाच धक्का बसला आहे. पण काँग्रेस आणि भाजपमध्ये चुरशीची लढत सुरू असताना झारखंडमधून राष्ट्रवादी काँग्रेससाठीही एक दिलासा देणारी बातमी आली आहे. झारखंडमधील एका मतदारसंघात राष्ट्रवादीचा उमेदवार पुढे असल्याची माहिती आहे. हुसेनाबाद मतदारसंघात राष्ट्रवादीचे उमेदवार कमलेश कुमार सिंह यांनी आघाडी घेतली आहे. या जागेवरचा निकाल अद्याप स्पष्ट झाला नसला तरीही सुरुवातीला हाती आलेल्या कलानुसार राष्ट्रवादीचे कमलेश कुमार सिंह हे आघाडीवर आहेत. झारखंडमध्ये उलथापालथ झारखंड विधानसभा निवडणुकीचं चित्र क्षणा-क्षणाला बदलताना दिसत आहे. मात्र 81 जागा असलेल्या झारखंड विधानसभा निवडणुकीत आतापर्यंत हातील आलेल्या कलानुसार भाजपला धक्का बसताना दिसत आहे. कारण काँग्रेस-जेएमएम आघाडी बहुमताच्या दिशेने वाटचाल करत आहे. आतापर्यंत काँग्रेस आणि मित्रपक्षांनी 42 जागांवर आघाडी घेतली आहे, तर भाजप 28 जागांवर आघाडीवर आहे. तसंच 11 ठिकाणी इतर पक्ष आघाडीवर आहेत. Jharkhand LIVE: महाराष्ट्रानंतर आता झारखंडही भाजपकडून निसटणार झारखंड विधानसभेत सध्या भाजपाची सत्ता आहे. रघुबर दास हे मुख्यमंत्री आहेत. तर विरोधी पक्षनेतेपदी हेमंत सोरेन हे आहेत. झारखंड विधानसभेत बहुमतासाठी 41 जागांची आवश्यकता आहे. झारखंड विधानसभेसाठी पाच टप्प्यात निवडणुका झाल्या होत्या. 30 नोव्हेंबर ते 20 डिसेंबर दरम्यान हे मतदान झालंय. झारखंड हे नक्षलग्रस्त राज्य म्हणून ओळखले जाते. मागच्या निवडणुकीत काय होती स्थिती? झारखंड विधानसभेमध्ये 81 सदस्य असून 2014 मध्ये झालेल्या विधानसभा निवडणुकीत भाजपकडे 44, झारखंड मुक्ती मोर्चाकडे 16, काँग्रेसकडे 6, आसूकडे 3, जे. व्ही. एम.कडे 2, सीपीआय एम एलकडे 01, बीएसपी कडे 01, एमसीसी कडे 01 तर सात जागा रिक्त आहे.

• Follow us on