)
मुंबई, 13 सप्टेंबर : महाराष्ट्राच्या राजकारणात कधी काय होईल याचा काहीच भरोसा नाही. सध्याच्या घडामोडींवरुन भविष्यातल्या राजकीय घडामोडींचा अंदाज बांधणं कठीण आहे. पण महाराष्ट्रात सध्या वेगवेगळ्या राजकीय घडामोडी घडताना दिसत आहेत. महाराष्ट्रात महाविकास आघाडीचं सरकार कोसळल्यापासून युवासेना प्रमुख आदित्य ठाकरे प्रचंड आक्रमक झाले आहेत. आदित्य ठाकरे यांनी आजही पत्रकार परिषद घेवून वेदांता कंपनी महाराष्ट्रातून गुजरातला कशी गेली? असा सवाल करत राज्य सरकारवर निशाणा साधला. राष्ट्रवादी काँग्रेसचे प्रदेशाध्यक्ष जयंत पाटील यांनीदेखील या मुद्द्यावरुन शिंदे सरकारवर निशाणा साधला. विशेष म्हणजे शिवसेना आणि राष्ट्रवादी काँग्रेसकडून अशाप्रकारची टीका होत असताना महाराष्ट्रात वेगळ्या राजकीय भेटीगाठीदेखील होताना दिसत आहेत. उपमुख्यमंत्री देवेंद्र फडणवीस रशिया दौऱ्यावर गेले असताना या भेटीगाठी होत आहेत. अर्थात या भेटीगाठींमध्ये काही महत्त्वाचे कारणं देखील असू शकतात. पण या भेटीगाठीकडे अनेकांचं लक्ष लागलं आहे. राष्ट्रवादी काँग्रेसचे नेते अजित पवार यांनी आज सह्याद्री अतिथीगृह येथे जावून मुख्यमंत्री एकनाथ शिंदे यांची भेट घेतली आहे. अजित पवार आणि एकनाथ शिंदे यांच्या भेटीचा आजचा टायमिंग वेगळा आहे. कारण उपमुख्यमंत्री देवेंद्र फडणवीस सध्या विदेश दौऱ्यावर गेले आहेत. रशियात लोकशाहीर अण्णाभाऊ साठे यांच्या तैलचित्राचं अनावरण देवेंद्र फडणवीस यांच्या हस्ते होणार आहे. त्याच निमित्ताने फडणवीस रशिया दौऱ्यावर गेले आहेत. पण दुसरीकडे आज सह्याद्री अतिथीगृहात अजित पवार आणि एकनाथ शिंदे यांच्यात भेट झाल्याची माहिती समोर आली आहे. ( ‘स्वत:साठी खोके आणि महाराष्ट्रासाठी…’, मोठी कंपनी महाराष्ट्राबाहेर गेल्याने आदित्य ठाकरे भडकले ) सूत्रांनी दिलेल्या माहितीनुसार, राज्यातील पशूंमध्ये वाढता लम्पि स्किन आजार आणि थांबलेला विकास निधीबाबत मुख्यमंत्री एकनाथ शिंदे यांच्यासोबत चर्चा करण्यासाठी अजित पवार सह्याद्री अतिथीगृहात गेले आहेत. पण राज्यातील गेल्या काही दिवसांपासूनच्या राजकीय घडामोडी पाहता या भेटींकडे अनेकांचं लक्ष लागलं आहे. मुख्यमंत्री एकनाथ शिंदे यांच्या भेटीसाठी अजित पवार यांच्यासोबत माजी मंत्री छगन भुजबळ देखील गेल्याची माहिती समोर आली आहे. दरम्यान, सूत्रांनी दिलेल्या माहितीनुसार अजित पवार, छगन भुजबळ यांच्यासोबत काँग्रेस नेते बाळासाहेब थोरात हे देखील मुख्यमंत्री एकनाथ शिंदे यांच्या भेटीसाठी गेले होते. मुख्यमंत्र्यांच्या भेटीनंतर थोरात यांनी प्रसारमाध्यमांना प्रतिक्रिया दिली. विरोधीपक्ष नेते अजितदादा, छगन भुजबळ आणि मी मुख्यमंत्री एकनाथ शिंदे यांना भेटलो. बजेटला कामे आली त्यांना स्थगिती दिली गेली, ती उठवावी, अशी मागणी आम्ही केली. DPDC होत नाही. कामे होत नाही. लवकर कामे मार्गी लागावी, अशी मागणी केली गेली. लम्पि आजाराबाबत सरकारने लसीकरण करावे, अशी मागणी आम्ही मुख्यमंत्र्यांकडे केली. कांद्याचा भाव कमी झाला आहे. कांद्यावरील ड्युटी कमी करावी यासाठी केंद्राकडे मागणी करावी. अशी मागणी मुख्यमंत्री यांच्याकडे केली आहे. ग्राहक आणि शेतकरी यांना परवडावे यासाठी सरकारने नियोजन करावे, अशी प्रतिक्रिया बाळासाहेब थोरात यांनी दिली.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
