Kanpur IIT Big News : नादखुळा! आयआयटी कानपूरनं तयार केला प्रगत व्हेंटिलेटर, खरेदीसाठी अमेरिकाही रांगेत

कानपूर, 09 फेब्रुवारी : कोरोनाच्या काळात अनेक रुग्णाचं जीव वाचवण्यासाठी व्हेंटिलेटर महत्त्वाचे ठरले. आता कानपूर आयआयटी स्वस्त दरात व्हेंटिलेटर उपलब्ध करून देण्याच्या तयारीत आहे. बाजारात उपलब्ध असलेल्या महागड्या व्हेंटिलेटरच्या तुलनेत, आयआयटी कानपूरनं अत्यंत प्रगत तंत्रज्ञानावर आधारित व्हेंटिलेटर ‘व्ही7 30आय’ (v7 30i) तयार केला आहे, जो लवकरच केवळ देशातच नव्हे तर युरोपीय देश आणि अमेरिकेतही विकला जाईल.

यासोबतच आयआयटी कानपूरनं तयार केलेलं पीपीई किट, मास्क अशा इतर मेडिकल साधनांचीसुद्धा विक्री केली जाईल. आयआयटी कानपूरला ही मेडिकल साधनं तयार करण्यासाठी युरोपीय देश आणि अमेरिकेकडून प्रस्ताव आला आहे.

हे ही वाचा : तरुणाने दृष्टिहीनांसाठी बनवली अनोखी स्टिक, सहज सापडेल रस्ता अन् सांगणार धोके

मात्र, या मेडिकल साधनांचा परदेशात पुरवठा करण्यापूर्वी त्याच्या सर्टिफिकेशन प्रोसेससाठी अंदाजे 2 वर्षे लागतील. त्यानंतर आयआयटी कानपूरच्या नोकार्क रोबोटिक्स कंपनीनं तयार केलेली ही उत्पादनं अमेरिका आणि युरोपीय देशांमध्ये पाठवली जातील.

आयआयटी कानपूरच्या बायोलॉजिकल सायन्स आणि बायोइंजिनीअरिंग विभागाचे प्रमुख प्रोफेसर अमिताभ बंदोपाध्याय यांनी सांगितलं की, ‘कोरोनाच्या वेळी आयआयटी कानपूरनं अवघ्या 90 दिवसांत व्हेंटिलेटर तयार केले होते. या व्हेंटिलेटरमुळे केवळ भारतामधीलच नव्हे, तर जगातील अनेकांचे प्राण वाचले होते. तेव्हापासून ही संस्था सातत्यानं मेडिकल उपकरणं बनवण्याचं काम करत आहे.’

आयआयटी कानपूरचा व्हेंटिलेटर मिळेल स्वस्त

बंदोपाध्याय यांनी सांगितलं की, ‘आता आयआयटी कानपूरनं अत्यंत प्रगत तंत्रज्ञानाचा वापर करून व्हेंटिलेटर तयार केलं आहे. सध्या उपलब्ध असलेल्या व्हेंटिलेटरपेक्षा ते खूपच स्वस्त आहे. त्याची किंमत जरी कमी असली तरी गुणवत्तेशी कोणतीही तडजोड करण्यात आलेली नाही. जर एखाद्या कंपनीच्या व्हेंटिलेटरची बाजारात किंमत 10 लाख असेल, तर आयआयटी कानपूरमध्ये तयार केलेला व्हेंटिलेटर 2 लाख रुपयांमध्ये मिळेल.’

विशेष म्हणजे, कोरोनाच्या काळापासून देशात आणि जगात प्रथमच मेडिकल साधनं किती महत्त्वाची आहेत, हे समजलं. त्यामुळे त्यानंतर सर्व देश त्यांच्या आरोग्य क्षेत्रातील सुविधांकडे लक्ष देत आहेत. भारतामध्येही जास्तीतजास्त आरोग्य सुविधा नागरिकांसाठी उपलब्ध करून देण्याचा प्रयत्न केला जातोय. अधिकाधिक मेडिकल उपकरणांचं उत्पादन करण्यावर भर दिला जातो आहे.

हे ही वाचा : ठाण्याच्या तरुणाच्या कल्पनेमुळे लाखो रुग्णांचा होतोय फायदा, पाहा Video

कोरोनासारखी परिस्थिती पुन्हा उद्भवल्यास, त्याला सामोरं जाण्याची तयारी सर्वच देशच करीत आहे. अशा परिस्थितीत पुन्हा एकदा आयआयटी कानपूरनं अत्यंत प्रगत तंत्रज्ञानावर आधारित व्हेंटिलेटर तयार करून देश आणि जगासमोर अनोखं उदाहरण ठेवलं आहे. त्यामुळेच आयआयटी कानपूरचं कौतुक करण्यात येत असून हे व्हेंटिलेटर प्रत्यक्षात विक्रीसाठी केव्हा येणार, याची प्रतीक्षा लागली आहे.