नागपूर, 25 जुलै : नक्षलवाद हे देशाच्या सुरक्षेसमोरील एक प्रमुख आव्हान आहे. आजवर हजारो निरपराध नागरिकांचा बळी घेणाऱ्या नक्षली चळवळीचा बिमोड करणे हे प्रत्येक सरकारपुढे आव्हान आहे. 28 जुलै ते 3 ऑगस्ट दरम्यान नक्षलवादी नक्षल शहीद सप्ताह पाळत असतात. हा सप्ताह सुरू होण्यापूर्वीच नक्षली चळवळीला मोठा हादरा बसलाय. लाखो रुपयांचे बक्षीस असलेल्या दोन जहाल नक्षलवाद्यांनी गडचिरोली पोलिसांपुढं आत्मसर्पण केलंय. कुणी केलं आत्मसमर्पण? अडमा जोगा मडावी (वय 26) आणि टुगे कारु वड्डे (वय 35) अशी या नक्षलवाद्यांची नावं आहेत. या दोघांवर मिळून छत्तीसगड सरकारनं आठ लाखांचे बक्षीस जाहीर केले होते. छत्तीसगड येथील बिजापूर जिल्हातील जिलोरगडा या लहानशा गावात राहणाऱ्या 26 वर्षीय अडमा हा जुलै 2014 ला पामेड एलजीएसमध्ये सदस्य पदावर भरती झाला होता. पुढे तो 2021 पर्यंत कार्यरत होता. जानेवारी 2021 ला झोन ॲक्शन टीममध्ये बदली झाली. अडमाचा 8 चकमकीत सहभाग होता. त्याने पाच खून केले आहेत. 2016 मध्ये बोटेतोंग जंगल परिसरातील चकमकीमध्ये तो सहभागी होता. तसेच 2017 मध्ये बुरकापाल जंगल परिसरातील चकमकीमध्ये तो सहभागी होता. यावेळी सीआरपीएफचे 25 जवान शहीद झाले होते. तसेच चिन्ना बोडकेल जंगल परिसरातील चकमकीमध्ये तो सहभागी होता. यावेळी पोलीस दलाचे 2 जवान शहीद आणि 5 जवान जखमी झाले होते.
दुसरा नक्षलवादी टुगे कारु वड्डे, हा छत्तीसगडमधल्या बिजापूर कवंडे गावातील रहिवासी आहे. टुगे हा 2012 पासून नक्षलवादी म्हणून कार्यरत होता. त्याच्यावर आत्तापर्यंत 6 खुनांचे गुन्हे दाखल झाले आहेत. मागच्या वर्षी 2022 मध्ये ईरपनार येथील रोड कामावरील 12 वाहनांची जाळपोळ करण्यात त्याचा सहभाग होता. सरकारनं जाहीर केलेली आत्मसमर्णन योजना, वर्षभरात वेगवेगळ्या माओवाद्यांचा झालेला खात्मा, हिंसाचाराला कंटाळून अनेक नक्षलवादी आत्मसमर्पण करत आहेत, अशी माहिती पोलीस अधिक्षक नीलोत्पल यांनी दिली. नीलोत्पल यांनी आत्मसमर्पित नक्षलवाद्यांना शांततेचे प्रतीक असलेला पांढरा दुपट्टा आणि पुष्पगुच्छ देऊन त्यांच्या निर्णयाचे स्वागत केले. सचिन फक्त एक मोहरा? सीमाचा उद्देश वेगळाच? वाचा महत्त्वाची अपडेट काय आहे नक्षली सप्ताह ? नक्षली सप्ताहामध्ये नक्षलवादी सरकारी मालमत्तेचे नुकसान करतात. सुरक्षा दलांवर हल्ले करतात. खबरी असल्याच्या संशयावरुन निष्पापांच्या हत्या करतात. रस्ते बंद करणे, बंद पुकारणे, धमकावणे, जनतेकडून पैसा वसूल करणे अशी कामे करतात. ठेकेदाराकडून खंडणी गोळा करणे अशा हिंसक कारवाया करतात. या सप्ताहापूर्वीच या नक्षलवाद्यांनी आत्मसमर्पण केल्यानं सुरक्षा दलांना मोठं यश मिळालं आहे.