भीषण अपघातामध्ये 25 जणांचा मृत्यू
बुलडाणा, 1 जूलै : समृद्धी महामार्गावर अपघाताची मालिका सुरूच आहे. शनिवारी पहाटे बसचा भीषण अपघात घडला आहे. हा अपघात एवढा भीषण होता की या अपघातामध्ये बसमधील 25 जणांचा जळून दुर्दैवी मृत्यू झाला आहे. तर आठ प्रवाशी जखमी झाले आहेत. जखमींना उपचारासाठी रुग्णालयात दाखल करण्यात आलं आहे. या बसमधून एकूण 33 प्रवासी प्रवास करत होते. या अपघाताचा पहिला व्हिडीओ आता समोर आला आहे. ही प्रवासी बस नागपूरहून पुण्याकडे जात असताना हा अपघात झाला. मिळत असलेल्या माहितीप्रमाणे ही बस विदर्भ ट्रॅव्हल्सची होती. समृद्धी महामार्गावर सिंदखेड राजाजवळील पिंपळखुटा गावाजवळ बस रस्ता दुभाजकावर आदळली. यानंतर बसला आग लागली. प्रवासी झोपेत असल्यामुळे त्यांना बाहेर पडता आला नाही. या अपघातामध्ये 25 जणांचा जळून मृत्यू झाला आहे. तर आठ जण बचावले आहेत. यामध्ये तीन चिमुकल्यांचाही समावेश असल्याची माहिती समोर येत आहे.
चालकाला घेतलं ताब्यात व्हिडीओमध्ये बसला आग लागल्याचं दिसत आहे. टायर फुटल्यानं बस दुभाजकाला धडकल्याचा दावा या बसचा चालक दानिश शेख इस्माईल शेख याने केला आहे. पोलिसांनी चालकाला तब्यात घेतलं आहे. अपघाताबाबत चौकशी सुरू असल्याची माहिती पोलिसांकडून देण्यात आली आहे.