अजित पवार राष्ट्रवादीच्या आमदारांवर भडकले
उदय जाधव, प्रतिनिधी मुंबई, 24 जुलै : उपमुख्यमंत्री अजित पवार हे त्यांच्यासोबत आलेल्या राष्ट्रवादी काँग्रेसच्या आमदारावर चांगलेच संतापले आहेत. भडकलेल्या अजित पवारांनी थेट मुख्यमंत्री एकनाथ शिंदे यांच्यासमोरच या आमदाराची खरडपट्टी काढल्याची माहिती विश्वसनीय सूत्रांनी दिली आहे. मुख्यमंत्री बदलावरून वक्तव्य करणाऱ्या मदत व पुनर्वसन मंत्री अनिल पाटील यांना उपमुख्यमंत्री अजित पवार यांनी मुख्यमंत्र्यांसमोरच झापलं आहे. अजित पवारांच्या आदेशानंतर अनिल पाटील यांनी मुख्यमंत्री एकनाथ शिंदे यांची माफी मागितल्याची माहितीही सूत्रांनी दिली आहे. उपमुख्यमंत्री अजित पवारांनी अन्न व औषध प्रशासन मंत्री धर्मराव बाबा अत्राम आणि अमोल मिटकरी यांनाही मुख्यमंत्री बदलाबाबत केलेल्या वक्तव्यावरून सुनावलं आहे. गेले दोन दिवस अजित पवार मुख्यमंत्री होणार यावरून चर्चा सुरू होती. यामध्ये राष्ट्रवादी काँग्रेसच्या काही नेत्यांच्या वक्तव्यांमुळे भर पडली होती. सरकारमध्ये सहभागी असताना अशाप्रकारची संभ्रम व्यक्त करणारी वक्तव्य आल्यामुळे अजित पवार नाराज झाले होते. महाराष्ट्रातल्या पूरग्रस्तांसाठी राज्य सरकारची मदत, अजित पवारांची विधिमंडळातून घोषणा अजित पवार लवकरच मुख्यमंत्रिपदाची शपथ घेतील, असं वक्तव्य राष्ट्रवादीचे आमदार अमोल मिटकरी यांनी केलं. यानंतर आता राष्ट्रवादीचे आणखी एक आमदार आणि मंत्री अनिल पाटील यांनीही मिटकरी यांच्या वक्तव्याला दुजोरा दिला. लवकरच अजित पवार मुख्यमंत्रिपदाची शपथ घेतील, असं अनिल पाटील म्हणाले होते.
सुनिल तटकरेंची रिएक्शन ‘राज्याच्या सरकारमध्ये आम्ही सहभागी झालो तेव्हा मुख्यमंत्रीपदावर स्पष्टता झाली आहे. आम्ही एनडीएचा घटक आहोत. मुख्यमंत्रीपद दादांना मिळावं, अशी राज्यातील अनेक कार्यकर्त्यांची इच्छा आणि अपेक्षा आहे. मात्र आता आम्ही महायुती उभी केली आहे, त्यामुळे आता मुख्यमंत्रिपदाचा विषयच नाही,’ असं सुनिल तटकरे म्हणाले आहेत.