मुंबई 12 मार्च: बॉलिवूड अभिनेत्री कंगना रणौत (Kangana Ranaut) आपल्या वादग्रस्त वक्तव्यांमुळं नेहमीच चर्चेत असते. बॉलिवूडमधील घराणेशाही ते देशभरातील राजकारण अशा विविध विषयांवर ती रोखठोकपणे प्रतिक्रिया देते. अनेकदा या स्वभावामुळं तिला ट्रोल देखील केलं जातं. असाच काहीसा प्रकार पुन्हा एकदा घडला आहे. अलिकडेच तिनं काश्मिर पंडीतांवर चित्रपट तयार करण्याची घोषणा केली होती. मात्र आता ती या चित्रपटामुळेचं ती अडचणीत सापडली आहे. कंगनानं काही दिवसांपूर्वी सोशल मीडियाद्वारे आपल्या आगामी चित्रपटाची घोषणा केली होती. या चित्रपटाचं नाव “डिडा द वाँरियर किंग” असं असेल असं ती म्हणाली होती. मात्र या चित्रपटाच्या पटकथेवर एका लेखकानं आक्षेप घेतला आहे. पीटीआयनं दिलेल्या वृत्तानुसार ही पटकथा ‘कश्मिर की योद्धा रानी डिडा’ या पुस्तकातून चोरल्याचा आरोप त्याने केला आहे. शिवाय कंगनाविरोधात त्यानं कॉपीराईट अंतर्गत पोलीस तक्रार देखील दाखल केली आहे. या प्रकरणामुळं कंगना आता आणखी अडचणीत येण्याची शक्याता वर्तवण्यात येत आहे.
यापूर्वी प्रसिद्ध गीतकार जावेद अख्तर यांनी देखील कंगनाविरोधात कोर्टाचा दरवाजा ठोठावला होता. अख्तर यांनी कंगनाविरोधात अंधेरी महानगरदंडाधिकाऱ्यांकडे बदनामी झाल्याची तक्रार केली होती. कंगनावर बदनामी केल्याचा गुन्हा दाखल होऊ शकतो असे अख्तर यांच्या तक्रारीवर अहवाल सादर करताना पोलिसांनी म्हटलं होतं. त्यानंतर न्यायालयानं कंगनाला समन्स बजावत हजर राहण्याचे आदेश दिले होते. मात्र ती हजर न झाल्याने न्यायालयाने तिच्याविरोधात टक वॉरंट बजावलं. आता कंगनानं देखील अंधेरी महानगरदंडाधिकाऱ्यांनी बजावलेल्या जामीनपात्र वॉरंटला सत्र न्यायालयात आव्हान दिलं आहे.