IPL 2022 : KKR पुन्हा विजयाच्या मार्गावर, रिंकू ठरला शाहरुखच्या टीमचा बाजीगर!

मुंबई, 2 मे : लागोपाठ 5 पराभवांनंतर कोलकाता नाईट रायडर्स (KKR) आयपीएल 2022 मध्ये (IPL 2022) पुन्हा एकदा विजयाच्या मार्गावर आली आहे. राजस्थान रॉयल्सविरुद्धच्या (KKR vs RR) सामन्यात केकेआरचा 7 विकेटने विजय झाला आहे. राजस्थानने दिलेलं 153 रनचं आव्हान केकेआरने 19.1 ओव्हरमध्ये पार केलं. रिंकू सिंग (Rinku Singh) आणि नितीश राणा (Nitish Rana) केकेआरच्या विजयाचे शिल्पकार ठरले. नितीश राणाने 37 बॉलमध्ये नाबाद 48 आणि रिंकू सिंगने 23 बॉलमध्ये नाबाद 42 रनची खेळी केली. राजस्थानने दिलेल्या आव्हानाचा पाठलाग करण्यासाठी आलेल्या केकेआरची सुरूवात खराब झाली. 32 रनवर त्यांचे दोन्ही ओपनर माघारी परतले होते. एरॉन फिंच 4 आणि बाबा इंद्रजीत 15 रनवर आऊट झाले, तर श्रेयस अय्यर (Shreyas Iyer) 34 रनवर पॅव्हेलियनमध्ये गेला. राजस्थानकडून बोल्ट, कृष्णा आणि कुलदीप सेन यांना प्रत्येकी 1-1 विकेट मिळाली. केकेआरचा कर्णधार श्रेयस अय्यरने या सामन्यात टॉस जिंकून पहिले बॉलिंगचा निर्णय घेतला, यानंतर त्यांनी राजस्थानला 20 ओव्हरमध्ये 152/5 वर रोखलं. संजू सॅमसनने 49 बॉलमध्ये सर्वाधिक 54 रन केले, तर शिमरन हेटमायर 13 बॉलमध्ये 27 रनवर नाबाद राहिला. केकेआरकडून टीम साऊदीला सर्वाधिक 2 विकेट मिळाल्या. उमेश यादव, अनुकूल रॉय आणि शिवम मावी यांना प्रत्येकी 1-1 विकेट घेण्यात यश आलं. केकेआरला लागोपाठ 5 पराभवांनंतरचा हा पहिला विजय आहे. प्ले-ऑफच्या शर्यतीत राहण्यासाठी त्यांना हा विजय मिळवणं गरजेचं होतं. या मोसमात केकेआरने 10 पैकी 4 सामन्यांमध्ये विजय मिळवला, तर 6 मॅचमध्ये त्यांना पराभव पत्करावा लागला. राजस्थानविरुद्धच्या या विजयासह केकेआर पॉईंट्स टेबलमध्ये आठव्या क्रमांकावरून सातव्या क्रमांकावर आली आहे. राजस्थान रॉयल्सचा हा लागोपाठ दुसरा पराभव आहे, याआधी मुंबईनेही त्यांना धक्का दिला होता. सलग दोन सामन्यांमध्ये पराभव झाले असले तरी राजस्थान पॉईंट्स टेबलमध्ये तिसऱ्या क्रमांकावर कायम आहे. त्यांनी 10 पैकी 6 मॅच जिंकल्या असून 4 मॅचमध्ये त्यांचा पराभव झाला आहे.

• Follow us on