siddheshwar yatra schedule has been announced in solapur Solapur : यंदा धुमधडाक्यात होणार सिद्धेश्वर यात्रा, पाहा संपूर्ण वेळापत्रक

सोलापूर, 11 जानेवारी : सोलापूरचे ग्रामदैवत श्री सिद्धरामेश्वर महाराजांच्या यात्रेला 900 पेक्षा अधिक वर्षाची परंपरा आहे. या यात्रेच्या कालावधीमध्ये जगभरातील सोलापूरकर आवर्जून सिद्धरामेश्वरच्या दर्शनासाठी येत असतात. त्याचबरोबर शेजारच्या जिल्ह्यांमधील अनेक भाविकही इथं गर्दी करतात. दोन वर्ष कोरोनाच्या सावटामुळे ही यात्रा बंद होती. परंतु आता कोरोनाचे सावट कमी झाल्याने यावर्षी यात्रा मोठ्या उत्साहात साजरी होणार आहे. या यात्रेचे वेळापत्रक जाहीर झाले असून 56 मातीच्या घागरी प्रमुख मानकरी यांच्याकडे सुपूर्त करण्याचा कार्यक्रम बाळवेस येथील कुंभार वाड्यात आज होणार आहे, अशी माहिती यात्रेचे प्रमुख मानकरी राजशेखर हिरेहब्बू यांनी दिली आहे.

जाहिरात

असे असतील सिद्धरामेश्वर यात्रेचे धार्मिक विधी

12 जानेवारी

रात्री 12.5 मिनिटांनी हिरेहब्बू यांच्या वाड्यात मानाच्या पहिल्या आणि दुसऱ्या नंदीध्वजास साज चढविण्याचा कार्यक्रम होणार आहे. त्यानंतर हिरेहब्बू आणि देशमुख यांच्या हस्ते पूजा होणार आहे.

Solapur : सोलापूरची ओळख असलेल्या सिद्धेश्वर मंदिराचा इतिहास माहिती आहे का? Video

13 जानेवारी मुख्य यात्रेची सुरुवात शुक्रवारपासून होणार आहे. शुक्रवारी सकाळी 8 वाजता पुन्हा एकदा मानाच्या पहिल्या दोन नंदीध्वजांची पूजा होते आणि यात्रेस खऱ्या अर्थाने प्रारंभ होतो. त्यानंतर सिद्धेश्वर प्रशाला समोर कलेक्टर कचेरीच्या जुन्या फाटकाजवळ 1 ते 7 काठ्या येऊन उभारल्यानंतर सरकारतर्फे कलेक्टर हे देशमुख आणि हिरेहब्बू यांना सरकारी आहेर करणार आहेत. हा मान ब्रिटिश काळापासून आजतागायत चालू आहे. तेथून हे नंदीध्वज सिद्धेश्वर मंदिरात 68 लिंगापैकी पहिले लिंग अमृत लिंगा जवळ येऊन थांबणार आहेत. त्यानंतर 68 लिंगास तैलाभिषेक होणार आहे. 68 लिंगास प्रदक्षिणा घालून रात्री 9 वाजता हिरेहब्बू वाड्यावर परत येणार आहेत. 14 जानेवारी यात्रेत या दिवसाला म्हणजेच अक्षता सोहळ्याला अनन्यसाधारण असे महत्त्व आहे. या दिवशी सिद्धेश्वर मंदिरात संमती कट्ट्याजवळ 7 काठ्या आल्यानंतर मंगलाष्टके म्हणून त्या ठिकाणी अक्षता सोहळा पार पडणार आहे.

15 जानेवारी

सकाळी 9 वाजता विधीवत पूजा होऊन मिरवणुकीने सर्वजण संमती कट्ट्याजवळ येऊन थांबणार आहेत. त्यानंतर 1 ते 7 काठ्यांना करमुठगी लावून सिद्धेश्वर तलावात स्नान घातले जाणार आहे. याच दिवशी रात्री दहाच्या सुमारास भाकणुकीचा कार्यक्रम होणार आहे.

16 जानेवारी

सायंकाळी 5 वाजता नंदीध्वज होम मैदान वर येऊन तिथे शोभेचे दारू काम होणार आहे. याच दिवशी कप्पड कळी या विधी संपन्न होणार आहे.

17 जानेवारी

मानकरांच्या निवासस्थानी सर्व भाविकांना खारीकाचा प्रसाद देऊन संध्याकाळी 10 वाजता नंदीध्वजांची शेवटची पूजा होणार आहे आणि पाच दिवसांच्या धार्मिक कार्यक्रमाची सांगता होणार आहे.

Solapur : सिद्धेश्वर यात्रेत योगदंडाचं महत्त्व काय आहे? पाहा Video

यात्रेतील हे महत्त्वाचे दिवस असून यंदाची यात्रा ही वेळेत पार पडेल तसेच दरवर्षी अक्षता सोहळ्यास होणारा उशीर यंदाच्या वर्षी होणार नाही. तरी कर्नाटक, आंध्र प्रदेश, मध्य प्रदेश येथुन येणाऱ्या सर्व भाविकांनी वेळेवर अक्षता सोहळ्याच्या दिवशी मंदिरात उपस्थित राहावे, असे आवाहन मानकरी राजशेखर हिरेहब्बू यांनी केले आहे.

जाहिरात

मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.

Tags: Local18 , solapur