Pune : पुण्याची पगडी पुन्हा वादात! पंतप्रधान मोदींच्या 'तुकाराम पगडी'वरील ओवी बदलली

पुणे, 14 जून : पुण्यातील पगडी (Puneri Pagadi) राजकारण काही नवीन नाही. पुणेरी पगडी, पेशवाई पगडीपासून फुले पगडीपर्यंत वाद-प्रतिवाद महाराष्ट्राच्या राजकीय विश्वात होतच असतात. आता पुन्हा पुण्यात पगडी राजकारण होत आहे. देहूत पंतप्रधान नरेंद्र मोदी येणार आहेत, त्या पार्श्वभूमीवर पंतप्रधान मोदींसाठी 'संत तुकाराम पगडी' तयार करण्यात आली. परंतु, त्यावरूनही वाद सुरू झाला. तो वाद नेमका काय आहे, ते पाहुया... (Special Tukaram Pagdi For Prime minister)

आज (14 जून) देहूत पंतप्रधान नरेंद्र मोदी यांच्या हस्ते जगद्गुरू संत तुकाराम महाराज मूर्ती, शिळा मंदिराचा लोकार्पण सोहळा पार पडत आहे. त्या पार्श्वभूमीवर देहू संस्थान आणि पोलीस विभागामार्फत जय्यत तयारी करण्यात आली आहे. मोदी येणार आहेत म्हणून देहू संस्थानाकडून पुण्यातील प्रसिद्ध पगडी (Tukaram Pagdi) तयार करणारे मुरुडकर झेंडेवाले यांना तुकोबांची पगडी आणि उपरणे तयार करण्यास सांगितले होते. त्यानुसार तुकाराम पगडी तयार करण्यात आली. मात्र, त्या पगडीवर समोरच्या बाजूला मध्यभागी लिहिण्यात आलेली ओवीवरून वाद निर्माण झाला आणि नंतर ही ओवी बदलण्यात आली आहे.

सुरूवातीला या पगडीवर 'कोणती' ओवी होती? 

ज्यावेळी पंतप्रधान मोदींसाठी जी पगडी तयार करण्यात आली होती, त्यावर ।। भले तरी देऊ कासेची लंगोटी, नाठाळाचे माथी हाणू काठी ।। ही तुकाराम महाराजांची ओवी लिहिण्यात आली होती. मात्र, आता या पगडीवरील ओवी बदलण्यात आली असून त्यावर ।। विष्णुमय जग वैष्णवांचा धर्म, भेदाभेद भ्रम अमंगळ ।। ही ओवी लिहिण्यात आली आहे. आता हीच पगडी उद्याच्या कार्यक्रमात पंतप्रधान नरेंद्र मोदी यांना भेट देण्यात येणार आहे. (Tukaram Pagdi Abhang changed)

वाचा : ‘पुण्याच्या मुलासाठी मुंबईच्या मुलीला भेटणं…’ सिद्धार्थच्या बर्थडेला मिताली मयेकरची अनोखी पोस्ट

संत तुकराम पगडी अगदी साध्या पद्धतीने बनविली आहे. त्या काळी जे कापड पगडीसाठी लागायचे त्याच पद्धतीच्या कापडाने हे पगडी आणि उपरणे बनविले जात आहे. पगडीवर तुळशीच्या माळांची सजावट असणार आहे. या पगडीची केस आणि स्टँडही वैशिष्ट पूर्ण बनविण्यात आला आहे. पगडीचा स्टॅडच्या दोन्ही बाजूला लोड आहे. या सोबतच वर चीपळ्या ठेवण्यात आल्या आहेत. त्याला टाळांची सजावटही करण्यात आली आहे. ऑफ व्हाईट रंगाची ही पगडी राहणार आहे. याच कापडाचे उपरणेही बनविण्यात आले आहे.

पगडी भपकेबाज नसून पारंपरिक आहे

यापूर्वीही पुण्यात पगडीवरून राजकारण झालेले होते. पुण्यात मेट्रो उद्घाटनाच्या वेळी पंतप्रधानांना महापालिकेकडून देण्यात आलेल्या फेट्यावर शिवमुद्रा होती. मात्र, त्याला आक्षेप घेतला. त्यानंतर ती शिवमुद्रा काढण्यात आली. यावर माध्यमांशी बोलताना पगडी डिझायनर मुरुडकर सांगतात की, "पंतप्रधान नरेंद्र मोदी यांच्यासाठी जी डिझायनर तुकाराम पगडी बनविण्यात आली आहे. ही भपकेबाज नसून पारंपरिक राहणार आहे. या मागचा आमचा उद्देशही तसाच आहे. यासाठी त्या काळी जे कापड ही पगडी बनविण्यासाठी वापरले जात होते, तेच कापड आम्ही वापरले आहे. ही पगडी वैशिष्ट्यपूर्ण आहे, ती घातल्यावर गंध आणि तिला वेगळी लावण्याची गरज पडणार नाही."