)
पुणे, 9 जानेवारी : राज्यातील गुन्हेगारीच्या घटनांमध्ये वाढ होत आहेत. पुण्यातही मारहाणीच्या घटना सातत्याने समोर येत आहेत. त्यातच आता पुण्यातून एक धक्कादायक घटना समोर आली आहे. आलिशान कारमध्ये बसलेल्या व्यक्तीला पत्ता विचारणे एका वकीलाला चांगलेच महागात पडले. पत्ता विचारल्यावर, ऑडी चालवणाऱ्या लोकांना पत्ता विचारता का असे म्हणत कारमध्ये बसलेल्या व्यक्तीने वकिलाला शिवीगाळ करुन मारहाण केली. ही घटना पुण्यातील जंगली महाराज रस्त्यावर घडली. काय आहे संपूर्ण प्रकरण - पुण्यात गुन्ह्यांच्या संख्येत सातत्याने वाढ होत आहे. पुण्यात रोज नवे गुन्हे समोर येत आहेत. क्षुल्लक कारणांमुळे वाद होऊन त्याचं हाणामारीत रुपांतर होण्याच्या घटना वाढत आहेत. यातच आता पुण्यातील जंगली महाराज रस्त्यावरील सुभद्रा हॉटेलसमोर एक धक्कादायक घटना घडली. ऑडी कारमध्ये बसलेल्या व्यक्तीला पत्ता विचारल्यावर त्याने पत्ता विचारणाऱ्या वकीलाला शिवीगाळ करत मारहाण केली. याप्रकरणी वकील विशाल शंकर सोनवणे (वय 42 वर्षे, रा. धानोरी) यांनी डेक्कन पोलिसात तक्रार दिली आहे. त्यानुसार एमएच 14 आर एफ 6685 या ऑडी कार चालकाविरोधात डेक्कन पोलीस ठाण्यात गुन्हा दाखल करण्यात आला आहे. अॅड. विशाल सोनवणे काही कामानिमित्त जंगली महाराज रस्ता परिसरात आले होते. त्यावेळी सुभद्रा हॉटेल समोर ओळीत काही गाड्या थांबल्या होत्या. त्यातील ऑडी कार चालकाला वकील विशाल सोनवणे यांनी ज्ञानमुद्रा ट्युटोरियल क्लासचा पत्ता विचारला असता ही बाब ऑडी कारच्या मालकाला आवडली नाही. तसेच त्याने आपल्याला पत्ता विचारला म्हणून प्रचंड राग आल्याने “तुम्हाला समजतं का, तुम्ही कोणाला पत्ता विचारत आहात, आम्ही ऑडी चालवणारे लोक आहोत” असे म्हणत विशाल सोनवणे यांना शिवीगाळ करुन हाताने मारहाण केली. हेही वाचा - काका उठला पुतण्याच्या जीवावर, ऊसाच्या शेतात दिसला तेव्हा… पुण्यातील धक्कादायक घटना या मारहाणीमुळे विशाल सोनवणे खाली पडले. यानंतर ऑडीचालक इतक्यावरच थांबला नाही तर त्याने त्यानंतर कार वेगाने घेऊन जात असताना गाडीचे चाक तक्रारदार वकिलाच्या पायावरुन गेलं. यामध्ये विशाल सोनवणे जखमी झाले आहेत. या प्रकरणी त्यांनी डेक्कन पोलीस स्टेशन गाठत ऑडी चालकाविरोधात तक्रार दाखल केली. त्यानंतर पोलिसांनी गुन्हा दाखल केला आहे. याप्रकरणी पोलीस पुढील तपास करत आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
