Gold Price: तीन दिवसांनंतर स्वस्त झालं सोनं, आतापर्यंत 5374 रुपये प्रति तोळाने उतरली किंमत
Gold Price Today : आंतरराष्ट्रीय बाजारात घसरण झाल्याने देशांतर्गत बाजारात तीन दिवसानंतर सोन्याच्या किंमती खाली आल्या आहेत. सोन्याची किंमत वरच्या पातळीपासून म्हणजेच प्रति दहा ग्रॅम 56200 वरून 50826 रुपये प्रति तोळा इतकी खाली आली आहे.
मंगळवारी आंतरराष्ट्रीय स्तरावर सोन्याचे दर उतरल्याचे पाहायला मिळाले. अमेरिकन डॉलरमध्ये आलेल्या तेजीमुळे सोन्याचे दर 3 आठवड्यातील सर्वात कमी स्तरावर आले आहेत. याचा परिणाम देशांतर्गत बाजारातील सोन्याच्या किंमतीवर देखील झाला आहे. मंगळवारी कमोडिटी एक्सचेंज एमसीएक्सवर सोन्याचांदीच्या दरात घसरण झाली आहे. MCX वर आज सुरुवातीच्या सत्रात डिसेंबरच्या डिलीव्हरीचे सोने 0.55 टक्क्यांने कमी होत 50826 रुपयांवर पोहोचले आहे. तर चांदीमध्ये 1.2 टक्क्यांची घसरण होऊन चांदी 62,343 रुपयांवर पोहोचली आहे. सर्वोच्च स्तरावरून सोन्याचे दर 5374 रुपये प्रति तोळाने कमी झाले आहेत.
आंतरराष्ट्रीय बाजारात सोन्याच्या किंमती कमी झाल्या आहेत. परदेशी बाजारात गोल्ड स्पॉटची किंमत 0.1 टक्क्यानी कमी होऊन 1919.51 डॉलर प्रति औंस वर ट्रेड करत आहे. तर चांदीचे दर 0.4 टक्क्यांनी कमी होऊन 25.02 डॉलर प्रति औंसवर पोहोचले आहेत. सोन्याच्या किंमतीत आज मोठी घसण नाही झाली कारण जगभरात कोरोना व्हायरसचा फैलाव मोठ्या वेगाने होत आहे आणि व्हॅक्सिनबाबत अद्याप ठोस असे काहीच हाती लागले नाही आहे.
सोन्याचे नवे दर (Gold Price on 12th October 2020)- HDFC सिक्योरिटीजच्या मते दिल्लीतील सराफा बाजारात सोमवारी सोन्याचे दर 240 रुपये प्रति तोळाने वधारले होते. आठवड्याच्या पहिल्या दिवशी सोन्याचे भाव वाढून 52,073 रुपये प्रति तोळावर पोहोचले आहेत. याआधी शुक्रवारी सोन्याचा व्यवहार 51,833 रुपये प्रति तोळावर बंद झाला होता.
