ह्या दोन जागांवर पीएम मोदी-शाहंचं होतं सर्वाधिक लक्ष; गेल्यावेळी बसला होता मोठा झटका

अहमदाबाद, 8 डिसेंबर : गुजरात विधानसभा निवडणुकीत यावेळी पंतप्रधान मोदींच्या वडनगर गावात आणि गृहमंत्री अमित शाह यांच्या मानसा गावात कमळ फुलणार हे नक्की आहे. गेल्या वेळी दोन्ही ठिकाणी काँग्रेसने विजय मिळवला होता. मात्र, यावेळी भाजपने वडनगर आणि मानसासाठी वेगळी रणनीती आखली होती. भाजपचे उमेदवार किरीट पटेल यांनी उंझा येथे तर पक्षाचे उमेदवार जयंती भाई पटेल यांनी मानसामध्ये निर्णायक आघाडी घेतली आहे.

वडनगरमधील आरएसएस कार्यकर्त्याला दिले तिकीट

यावेळी भाजपने किरीटकुमार केशवलाल पटेल यांना वडनगरमध्ये उंझा विधानसभेचे तिकीट दिले होते. पटेल हे राष्ट्रीय स्वयंसेवक संघाचे प्रमुख मोहन भागवत यांच्या जवळचे असल्याचे सांगितले जाते. भाजप कार्यकर्त्यांच्या म्हणण्यानुसार किरीट पटेल यांचे नाव निश्चित होण्यापूर्वी तिकीटावरून गटबाजी होती, नावे समोर येत होती. किरीट पटेल यांचे नाव पुढे येताच गटबाजी थांबली. संघ प्रमुखांच्या जवळ असल्याने संघाच्या स्वयंसेवकांनी त्यांच्या प्रचारात कोणतीही कसर सोडली नाही.

1995 पासून भाजप सतत जिंकत होता, 2017 मध्ये हरला

उंझा हा भाजपचा बालेकिल्ला मानला जातो. 1995 पासून येथे पक्ष सातत्याने विजयी होत होता, परंतु 2017 मध्ये काँग्रेसच्या डॉ. आशा पटेल यांनी भाजपच्या नारायणभाई लल्लुदास यांचा पराभव केला. याची दोन कारणे होती. पहिले, पाटीदारांचे आंदोलन आणि दुसरे म्हणजे चार वेळा भाजपचे आमदार राहिलेले नारायणभाई लल्लूदास पटेल यांच्या विरोधात सत्ताविरोधी आंदोलन. त्यामुळेच यावेळी उंझातील संपूर्ण कमान आरएसएसने आपल्या ताब्यात घेतली होती. प्रसिद्धीही अगोदरच करण्यात आली आणि त्यांच्या मर्जीचा उमेदवारही निश्चित करण्यात आला.

वाचा - Gujarat Election Results : 'गॉडमदर'च्या मुलाचा 'पॉवर' गेम पवारांना पडला भारी; NCP ने तिकीट नाकारलेलं तरी मैदानात उतरून उलटवली बाजी

50 वर्षे फक्त काँग्रेसचा विरोधी पक्ष जिंकत होता

उंझा येथील काँग्रेसचे ज्येष्ठ नेते पटेल बाबूलाल नथालाल यांच्या म्हणण्यानुसार, गेल्या 50 वर्षांपासून काँग्रेसच्या विरोधात असलेल्या पक्षाचा उमेदवार येथे विजयी होत आहे. आधी जनता दलाचे उमेदवार विजयी व्हायचे, नंतर भाजप जिंकू लागला. याचे प्रमुख कारण म्हणजे येथील पाटीदारांची मोठी लोकसंख्या. ते कधीही काँग्रेसला मत देत नाहीत. ब्राह्मण, बनिया, मोदी, प्रजापती हे 20 वर्षांपूर्वी काँग्रेसचे मतदार होते, पण आता ते भाजपमध्ये गेले आहेत.

यावेळी शाह यांनी मानसासाठी रणनीती आखली होती

अमित शाहंच्या मानसा गावात गेल्या दोन वेळा काँग्रेस विजयी होत होती. त्यामुळेच यावेळी येथील निवडणुकीची संपूर्ण रणनीती स्वत: अमित शाह यांच्या देखरेखीखाली तयार करण्यात आली होती. मानसातील उमेदवाराची घोषणाही भाजपकडून लांबणीवर पडली. अनेक ठिकाणाहून अभिप्राय घेऊन जयंती पटेल यांना तिकीट देण्यात आले. तर काँग्रेसने मोहनसिंग ठाकोर (बाबूजी) यांना उमेदवारी दिली होती.

पाटीदारांची मते मिळवण्यात भाजपला यश

मानसात पाटीदार समाजाची लोकसंख्या सर्वाधिक आहे. त्यांची सुमारे 45 हजार मते आहेत. ठाकोर सुमारे 42 हजार, राजपूत 30 हजार आणि चौधरी सुमारे 23 हजार आहेत. ब्राह्मण आणि बनिया लोकसंख्या खूपच कमी आहे. यावेळी पाटीदारांची मते मिळवण्यात पक्षाला यश आल्याचे भाजपच्या वाढीवरून दिसून येते. इथे पाटीदार आणि ठाकोर मते एका बाजूला पडावीत यासाठी प्रत्येक पक्ष प्रयत्न करतो. हे दोन समाज कोणत्याही उमेदवाराला विजयी करू शकतात.