मुंबईत मास्क न घातल्यानं दंड मागितला असता महिलेची BMC मार्शलला जबरदस्त मारहाण, VIDEO VIRAL

मुंबई 20 मार्च : मुंबईत कोरोना रुग्णांची संख्या दिवसेंदिवस वाढत आहे. यावर नियंत्रण आणण्यासाठी पालिकेच्यावतीने रस्त्यावर मार्शल तैनात करण्यात आले आहेत. हे मार्शल मास्क न घालणारे किंवा सार्वजनिक ठिकाणी घाण करणाऱ्यांवर लक्ष ठेवत असून त्यांच्याकडून दंड वसूल करतात. मात्र, याच मार्शलला नागरिक आता मारहाण करत आहेत. अशीच घटना कांदिवलीत घडली आहे. यात एक महिला रिक्षाने प्रवास करत असताना मास्क न घातल्याने महिला मार्शलने तिला दंड भरण्यास सांगितले. मात्र, त्या महिलेने दंड तर भरला नाहीच पण या महिला मार्शललाच मारहाण (Woman Beating BMC Marshal Over For About Not Wearing Mask) करत शिवीगाळ केली. या मारहाणीचा व्हिडीओ सोशल मीडियावर व्हायरल झाला आहे. याची दखल चारकोप पोलिसांनी घेतली असून याबाबत अधिक तपास सुरू आहे. व्हिडीओमध्ये असं दिसतं, की रिक्षानं प्रवास करत असलेल्या महिलेनं मास्क घातलेलं नाही. यामुळे महिला मार्शलनं तिला दंड भरण्यास सांगितलं. मात्र, मार्शलनं दंड मागताच रिक्षातील महिलेला आपला राग अनावर झाला आणि तिनं मार्शलला मारहाण करण्यास सुरुवाती केली. रस्त्यातच या महिलेनं मार्शलला लाथांनी मारहाणदेखील केली. दोघींच्यातील हे भांडण मिटण्याचं नाव घेत नव्हतं. याच घटनेचा व्हिडीओ सोशल मीडियावर मोठ्या प्रमाणात व्हायरल झाला. मला थांबवण्याची हिम्मत कशी केली, असं या महिलेचं म्हणणं होतं.

मुंबईत मास्क न घातल्यानं दंड मागितला असता महिलेकडून मार्शलला मारहाण pic.twitter.com/mj4xxMLfSD

— News18Lokmat (@News18lokmat) March 20, 2021

मुंबईमध्ये मास्क न घातल्यास 200 रुपयांचा दंड आहे. मात्र, तरीही या महिलेनं आपली चूक मान्य न करता मार्शलवरच हल्ला केला आहे. राज्यात कोरोना रुग्णसंख्येत दिवसेंदिवस झपाट्यानं वाढ होत आहे. अशात नागरिकांच्या याच हलगर्जीपणामुळं कोरोनाचा प्रसार अधिक वेगानं होत आहे. राज्यात शुक्रवारी 25,681 नव्या कोरोना रुग्णांची नोंद झाली आहे. आरोग्य विभागाच्या म्हणण्यानुसार राज्यातील एकूण कोरोना रुग्णांची संख्या 24,22,021 इतकी झाली आहे. तर, शुक्रवारी कोरोनामुळे सत्तर जणांचा मृत्यू झाल्यानं आतापर्यंतचा मृतांचा आकडा 53,208 वर पोहोचला आहे. राज्यात गुरुवारी 25,833 नवे कोरोना रुग्ण आढळले होते आणि दररोज येणाऱ्या रुग्णसंख्येचा हा एक नवा रेकॉर्ड होता. मुंबईबद्दल बोलायचं झाल्यास मुंबईत शुक्रवारी कोरोनाचे नवे 3,062 रुग्ण आढळून आले आहेत. यामुळे एकूण रुग्णांची संख्या वाढून 3,55,897 वर पोहोचली आहे.