)
मुंबई, 8 मे : लोकल ट्रेन (Local Train) ही मुंबईची लाईफलाईन मानली जाते. मुंबईतील चाकरमान्यांच्या वाहतुकीसाठी मुंबई लोकल अत्यंत महत्त्वाचं साधन आहे. मुंबईहून लांब पल्ल्याच्या देखील गाड्या सुटतात. त्यामुळे इथल्या रेल्वे स्थानकांवर तुफान गर्दी बघायला मिळते. अनेकजण गावी जाणाऱ्या आपल्या नातेवाईकांना सोडण्यासाठी रेल्वे स्थानकावर येतात. ते त्यांना रेल्वेत बसतात. अशा नागरिकांना प्लॅटफॉर्म तिकीट (Platform Ticket) काढणं आवश्यक असतं. या तिकीटाचा दर याआधी फार जास्त नव्हता. आधी तो पाच रुपये इतका असायचा. त्यानंतर तो दहा रुपये इतका करण्यात आला. याच प्लॅटफॉर्म तिकीटच्या किंमती संदर्भात एक महत्त्वाची अपडेट समोर आली आहे. रेल्वे प्रशासनाने मुंबई आणि उपनगरातील काही महत्त्वाच्या रेल्वे स्थानकांवर पुढच्या 15 दिवसांसाठी रेल्वे प्लॅटफॉर्म तिकीट हे 50 रुपये इतकं केलं आहे. मध्य रेल्वेचे मुख्य जनसंपर्क अधिकारी शिवाजी सुतार यांनी आपल्या अधिकृत ट्विटर अकाउंटवर याबाबत माहिती दिली आहे. 9 मे 2022 ते 23 मे 2022 या 15 दिवसांसाठी प्लॅटफॉर्म तिकीटच्या किंमतीत वाढ करण्यात आली आहे. यामध्ये दादर, एलटीटी, ठाणे, कल्याण आणि पनवेल या रेल्वे स्थानकांचा समावेश असेल. या रेल्वे स्थानकांवर प्लॅटफॉर्म तिकीट हे 10 रुपयांऐवजी 50 रुपयांत मिळेल. ही दरवाढ सध्यातरी पुढच्या 15 दिवसांसाठी असल्याची माहिती मिळत आहे. प्लॅटफॉर्म तिकीटाच्या दरवाढीमागे नेमकं कारण काय? मध्य रेल्वेचे मुख्य जनसंपर्क अधिकारी शिवाजी सुतार यांनी दिलेल्या माहितीनुसार, एप्रिल महिन्यात अलार्म चेन पुलिंग अर्थात आपात्कालीन साखळी ओढण्याच्या तब्बल 332 घटना घडल्या आहेत. यापैकी फक्त 53 घटना या योग्य कारणासाठी घडल्या आहेत. तर 269 प्रकरणात आरोपींनी कारण नसताना आपात्कालीन साखळी ओढली होती. या प्रकरणी आरोपींविरोधात गुन्हा दाखल करण्यात आला. पण त्यापैकी बऱ्याच आरोपींची ओळख पटलेली नाही. ते अनोळखी आहेत. त्यामुळे त्यांना पकडणं हे रेल्वे पोलिसांपुढील मोठे आव्हान आहे. मध्य रेल्वे प्रशासनाने पकडलेल्या आरोपींकडून 94 हजार रुपयांचा दंड वसूल करण्यात आला आहे. ( मधुमेह आजाराला कंटाळून एकाने घेतला गळफास, पुण्यातील धक्कदायक घटना ) दरम्यान, आपात्कालीन साखळी ओढल्याने रेल्वेच्या वेळांमध्ये बदल झाला. काही लोकल ट्रेन या उशिरा धावल्या. त्यामुळे लाखो नागरिकांचा वेळ वाया गेला. प्रवाशांच्या या गैरसोयीची काळजी पाहता मध्य रेल्वे प्रशासनाने प्लॅटफॉर्मवरील गर्दी कमी करण्यासाठी मुंबईतील काही रेल्वे स्थानकांवरील प्लॅटफॉर्म तिकीटांचा दर वाढवण्याचा निर्णय घेतला आहे. त्यानुसार उद्यापासून 15 दिवस सीएसएमटी, दादर, एलटीटी, ठाणे, कल्याण आणि पनवेल या रेल्वे स्थानकांवर प्लॅटफॉर्म तिकीटाचा दर हा 50 रुपये इतका असणार आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
