H3N2 चा धोका वाढला, राज्यात निर्बंध लागणार? मुख्यमंत्र्यांनी दिले नवे आदेश

मुंबई, 16 मार्च : राज्यात कोरोनाची लाट ओसरल्यानंतर आता H3N2 संसर्गजन्य व्हायरसने डोक वर काढलं आहे. मागील तीन दिवसांमध्ये राज्यात 3 जणांचा मृत्यू झाला आहे. त्यामुळे याची दखल राज्य सरकारने घेतली आहे. मुख्यमंत्री एकनाथ शिंदे यांनी नुकतीच संसर्गजन्य H3N2 ची आढावा बैठक घेऊन नवे आदेश दिले आहे.

मुख्यमंत्री एकनाथ शिंदे यांनी आज H3N2 संसर्गाबाबत बैठक घेतली आहे. या बैठकीला आरोग्यमंत्री तानाजी सावंत यांच्यासह आरोग्य विभागातील वरिष्ठ अधिकारी उपस्थित होते. या बैठकीत कोविड / H3N2 हे दोन्ही संसर्गजन्य असून दोघांचीही लक्षणही सारखी आहेत.

त्याच बरोबर या व्हायरसच्या प्रसाराची कारणेही सारखी आहेत. त्यामुळेच मुख्यमंत्र्यांनी कोविड काळात उभी करण्यात आलेली यंत्रणा ही पुन्हा अॅक्टीव्ह करण्याच्या सूचना देण्यात आलेल्या आहेत.

त्याच बरोबर गरोदर महिला, लहान मुलं, वृद्ध आणि आजारी नागरिकांनी गर्दीच्या ठिकाणी जाणं टाळावे. तसेच सर्दी खोकला यासारखी लक्षणं आढळल्यास डॉक्टरांच्या सल्यानुसार औषध घ्यावी, अशी सूचना मुख्यमंत्री शिंदेंनी दिल्या आहेत. तसंच, गर्दीच्या ठिकाणी शक्यतो मास्क वापरण्याचे आवाहन करण्याबाबत सूचना सुद्धा देण्यात आलेल्या आहेत.

(H3N2 चा महाराष्ट्रात उद्रेक, पुण्यात एका रुग्णाचा मृत्यू, राज्यात तिसरा बळी)

दरम्यान, पिंपरी चिंचवडमध्ये H3N2 विषाणुमुळे एका रुग्णाचा मृत्यू झाला आहे. राज्यातील हा तिसरा बळी आहे. यापूर्वी अहमदनगर आणि नागपूरमध्ये H3N2 बाधित दोन रुग्णांचा मृत्यू झाला आहे. आज पिंपरी-चिंचवडमध्ये आणखी एका रुग्णाचा मृत्यू झाल्याचं समोर आलं आहे. त्यामुळे आता राज्यातील H3N2 बाधित रुग्णाच्या मृत्यूची संख्या तीनवर पोहोचली आहे.

पिंपरी चिंचवडमध्ये पहिला बळी

पिंपरी चिंचवडमध्ये एच 3 एन 2 विषाणूची लागन झालेल्या एका वृद्धाचा मृत्यू झाला आहे. हा 73 वर्षीय वृद्ध अनेक आजारांनी ग्रस्त असल्याची माहिती वैद्यकीय अधिकाऱ्यांकडून देण्यात आली आहे. दुसरीकडे शहरातील आणखी चार व्यक्तिंना एच 3 एन 2 ची लागण झाल्याची प्राथमिक माहिती आहे. मात्र या सर्व रुग्णांची प्रकृती स्थिर आहे.

अहमदनगरमध्ये एकाचा मृत्यू

देशात नव्याने आढळलेल्या H3N2 व्हायरससह कोरोनाची लागण झालेल्या अहमदनगरमधील एका रुग्णाचा मृत्यू झाला आहे. हा रुग्ण मेडिकल कॉलेजचा विद्यार्थी होता. त्याच्यावर एका खासगी रुग्णालयामध्ये उपचार सुरू होते. उपचारादरम्यान त्याचा मृत्यू झाला. या रुग्णाला कोरोनाची लागण झाली होती. सोबतच तपासणीमध्ये त्याला H3N2 व्हायरसची देखील लागन झाल्याचं समोर आलं होतं.