Paytm अलर्ट! ग्राहकांनी या गोष्टीकडे दुर्लक्ष केल्यास होऊ शकते फसवणूक

नवी दिल्ली, 05 मे : कोरोनाच्या संकटकाळात जर तुम्ही पेमेंटसाठी कॅशलेस पद्धती वापरत असाल आणि डिजिटल पेमेंटच्या पर्यायांपैकी तुम्ही जर Paytm चा वापर करत असाल तर ही बातमी तुमच्यासाठी महत्त्वाची आहे. पेटीएम युजर्सना पेटीएमच्या संस्थापकांनी असा इशारा दिला आहे की, ग्राहकांनी 'पैसे दुप्पट करून देतो' अशा बनावट मेसेज किंवा मेल्सपासून सावधानता बाळगली पाहिजे. विजय शेखर शर्मा यांनी ट्विटरवरून ग्राहकांना या स्कॅमपासून सांभाळून राहण्याचा इशारा दिला आहे. ऑनलाइन फ्रॉडचा शिकार झालेल्या एका पेटीएम युजरला उत्तर देताना विजय शेखर यांनी हा इशारा दिला आहे. (हे वाचा- PhonePe वापरून घरबसल्या करू शकता चांगली कमाई, सोन्यामध्ये देखील गुंतवणूक शक्य) या पोस्टमध्ये शर्मा यांना एका युजरने सांगितले की पैसे दुप्पट करून देण्याच्या आमिषाला तो बळी पडल्यामुळे त्याचे 2000 रुपये बुडाले आहेत. शर्मा यांनी त्याच्या तक्रारीचा स्क्रीनशॉट देखील शेअर केला आहे.

And here, someone’s priorities are so wrong ‼️ Why would you send money to someone , and expect double in return 🙄😑⁉️ Never fall for such illogical baits❌ https://t.co/X9QGNzXRI2 pic.twitter.com/VdxiWvmO7h

— Vijay Shekhar Sharma (@vijayshekhar) May 2, 2020

टेलिग्रामवरून होत आहे फसवणूक शर्मा यांनी ट्विटरवर ज्या युजरच्या तक्रारीचा स्क्रीनशॉट शेअर केला आहे, त्यावरून असे लक्षात येते की ही फसवणूक एका टेलिग्राम ग्रृपच्या माध्यमातून होत आहे. ज्यामध्ये फसवणूक करणारे भामटे ग्राहकांना पेटीएमच्या माध्यमातून पैसे पाठवण्यास सांगत आहेत आणि तेच पैसे त्यांना दुप्पट करून मिळतील असं आमिष दाखवण्यात येत आहे. ज्या युजरने तक्रार केली आहे, त्याचे देखील 2000 रुपये बुडाले आहेत. (हे वाचा- इंग्रजी येत नसून बनले लोकप्रिय ZOOM अ‍ॅपचे सर्वेसर्वा,आज 48.44 हजार कोटी संपत्ती) याआधी देखील पेटीएम केवायसीच्या नावावर फसवणूक झाल्याची अनेक प्रकरणं समोर आली होती. एवढच नव्हे तर कॉलवरून होणाऱ्या व्हेरिफिकेशन दरम्यान लिंक पाठवली जाते आणि त्या लिंकवर क्लिक करायला सांगून पैसे लंपास केले जातात. फिशिंगची अशी काही प्रकरणं समोर आली आहेत. गेल्यावर्षी नोव्हेंबरमध्ये सुद्धा पेटीएमवरून फसवणुकीचे अनेक प्रकार समोर आले होते. तेव्हा देखील संस्थापकांनी पेटीएमशी निगडीत बनावट फोन कॉल, एसएमएस अलर्टपासून सावधान राहण्याचा इशारा दिला होता. संपादन-जान्हवी भाटकर