तुमच्या घरात सोन्याचा हंडा सांगून महिलेला हजारोंचा गंडा, वर्ध्यात नेमकं काय घडलं?

नरेंद्र मते, प्रतिनिधी

वर्धा, 19 मार्च : राज्यात दिवसेंदिवस गुन्हेगारीच्या घटनांमध्ये मोठ्या प्रमाणात वाढ होत आहे. त्यातच आता आणखी एक धक्कादायक घटना समोर आली आहे. तुमच्या घरात सोन्याचा हांडा आहे, तो काढण्यासाठी पैसे लागतील. तसेच सोन्याचा हिरादेखील आहे, असे आमिष दाखवून एका महिलेकडून 50 हजार रुपये उकळल्याचा प्रकार समोर आला आहे.

काय आहे संपूर्ण प्रकरण -

महिलेने सोन्याच्या हांड्याची पाहणी केली असता त्यातून सोन्याचे पॉलिश केलेले दगड निघाले. फसवणूक झाल्याचे लक्षात येताच महिलेने परिसरातील नागरिकांच्या मदतीने दोन्ही भामट्यांना पकडून ठेवत पोलिसांच्या स्वाधीन केले. पोलिसांनी दोन्ही आरोपींना अटक केली आहे. पोलिसांनी अटक केलेल्यांत आसाराम नंदू वाघ, रोशन पिसाराम गुजर रा. परसोळी ता. कळमेश्वर जि. नागपूऱ यांचा समावेश असून दोन आरोपी फरार असल्याची माहिती आर्वी पोलिसांनी दिली.

आर्वी पोलीस स्टेशन अंतर्गत येणाऱ्या वाढोणा येथील इंदिरा गुलाब राऊत ही महिला घरी असताना 9 मार्च रोजी हातात मोरपीस असलेला झाडू घेऊन दोन व्यक्ती आले. त्यातील एकाने दहा रुपये मागितले. इंदिराने दहा रुपये दिले असता एकाने डोक्यावर झाडू मारुन तुमच्या घरात सोन्याचा हांडा आहे, तो काढण्यासाठी 6 हजार रुपये लागतील, असे सांगितले. यानंतर इंदिरा राऊत या महिलेने सहा हजार रुपये उसने घेऊन त्या व्यक्तीस दिले.

दोघांनीही पैसे घेतले आणि तेथून चालले गेले. 11 मार्च रोजी सकाळी 8 वाजताच्या सुमारास दोघेही पुन्हा महिलेच्या घरी आले आणि घरातील पोर्च जवळ खड्डा करुन जमिनीतून हांडा काढला. हांड्यात मूर्ती आणि सोन्याचे दगडे होते. दोघांनी पुन्हा महिलेकडून 13 हजार रुपये घेतले. त्यानंतर दोघांनी तुमच्या घरात यापेक्षाही एक मोठा हिरा आहे तो नंतर काढून देतो, असे म्हणत पैसे घेऊन दोघेही निघून गेले.

आजारी ऊसतोड मजुराला कामावर येत नसल्याने मुकादमाची बेदम मारहाण; पुढं घडलं भयानक

दुसऱ्या दिवशी फोन करुन माझ्या मित्राला 21 हजार रुपये देऊन त्याच्याकडून औषध घेऊन या असे भामट्याने सांगितले. महिलेच्या मुलाने सकाळच्या सुमारास बसस्थानकावर जात 21 हजार रुपये देत औषध घेत घरी आणले. दोन्ही आरोपी पुन्हा घरी आले. यावेळी मुलाने त्यांना औषध दिले. त्यांनी ते औषध त्या खड्ड्यात टाकत हांडा काढून देतो असे सांगितले. तसेच, याया खड्ड्यात मोठा हिरा आहे, असे म्हणत तो खड्डा बुजवून 10 हजार रुपये घेतले.

यानंतर 12 मार्च रोजी महिलेच्या मुलाने भामट्याला फोन केला असता हिरा काढण्यासाठी 9 लाख 10 हजार रुपये द्यावे लागेल असे सांगितले. अखेर महिलेने पैसे देणे होत नसल्याचे सांगितले. महिलेला संशय आल्याने तिने हांडा उघडून पाहिला असता त्यान सोन्याचे पॉलिश केलेले दगडे आणि मूर्ती होती. अखेर महिलेला आपली फसवणूक झाल्याचे लक्षात आले. याप्रकरणी पोलिसांनी अटक केलेल्यांत आसाराम नंदू वाघ, रोशन पिसाराम गुजर रा. परसोळी ता. कळमेश्वर जि. नागपूऱ यांचा समावेश असून दोन आरोपी फरार आहेत. तसेच फरार आरोपींचा शोध सुरू असून याप्रकरणी आर्वी पोलीस पुढील तपास करत आहेत.