हिशेब तर द्यावाच लागेल, संजय राऊतांवरील कारवाईने सोमय्या सुखावले

मुंबई, 31 जुलै :  संजय राऊत यांना हिशेब तर द्यावा लागणार आहे. पत्राचाळ घोटाळा असो, वसईचा बीएससीएल घोटाळा असो. प्रत्येक गोष्टीचा हिशेब द्यावा लागणार आहे, असं म्हणत भाजपचे नेते किरीट सोमय्या यांनी ईडीच्या कारवाईचे स्वागत केले आहे.

पत्राचाळ प्रकरणी शिवसेनेचे खासदार संजय राऊत यांच्या घरी ईडीचे पथक दाखल झाले आहे. ईडीच्या कारवाईमुळे शिवसेनेत खळबळ उडाली आहे. किरीट सोमय्या यांनी आपल्या शैलीत संजय राऊत यांच्या कारवाईचा आनंद व्यक्त केला आहे.

'ईडीच्या कारवाईचे स्वागत करत आहे. संजय राऊत यांना हिशेब तर द्यावा लागणार आहे. पत्राचाळ घोटाळा असो, वसईचा बीएससीएल घोटाळा असो, माफियागिरी असो, दादागिरी असो प्रत्येकाला जेलमध्ये टाकण्याची धमकी देणाऱ्या महाविकास आघाडीचा जो महाराष्ट्राला लुटण्याचा हिशेब सुरू होता, त्याचा हिशेब तर द्यावा लागणार आहे. संजय राऊत यांनीही हिशेब द्यावा लागेल, अशी प्रतिक्रिया किरीट सोमय्यांनी दिली.

तर शिवसेनेचे बंडखोर आमदार संजय शिरसाट यांनी आनंद व्यक्त केला आहे. 'गेल्या चार-पाच वेळापासून ईडीने त्यांना समन्स बजावला होता. त्यांची चौकशीही सुरू होती. जर त्यांनी काही केलं नसेल तर ते सुटतील. पण, त्यांनी काही घोटाळे केले आहे, जो भ्रष्टाचार केला आहे, त्यात त्यांचा हात असल्याचे दिसून येत आहे' असा दावाच शिरसाट यांनी केला.

(मंत्रिमंडळ विस्तार, खातेवाटपाबाबतच्या मतभेदांवर तोडगा; बैठकीत काय ठरलं?)

'जर संजय राऊत यांना अटक झाली तर शिवसैनिक खूश होतील. शिवसैनिकांची भावना होती. ज्याने शिवसेना फोडली, त्याने मातोश्रीला त्रास देण्याचे काम केले त्याच्यावर जर ईडीची रेड झाली तर काही आश्चर्य वाटण्याचे काम नाही' असंही शिरसाट म्हणाले.

'ईडी असेल सीबीआय असेल, कायदा आहे. प्रत्येकावर कारवाईही कायद्याने झाली आहे. सोनिया गांधी, राहुल गांधी यांच्यावरही कारवाई झाली आहे. ते कायदेशीर लढाई लढत आहेत तसेच संजय राऊतांनी लढाई लढली पाहिजे. संजय राऊत यांनी तर आव्हानच दिलं आहे, ईडीने आपल्याला अटक करावी. बघूया आता काय होतं, असा खोचक टोलाही शिरसाट यांनी लगावला.