संजय राठोडांचा राजीनामा घेतला तर.., पोहरादेवीच्या महंतांनी दिला थेट शिवसेनेला इशारा

वाशिम, 28 फेब्रुवारी : पूजा चव्हाण (Pooja Chavan) आत्महत्या (suicide) प्रकरणी शिवसेनेचे नेते आणि वनमंत्री संजय राठोड (Sanjay Rathod) राजीनामा (resign) देण्याची शक्यता आहे. पण, पोहरादेवी मंदिराच्या महंत जितेंद्र महाराज यांनी विरोध केला आहे. तसंच, संजय राठोड यांचा राजीनामा घेतला तर आमदारकीचा राजीनामा देण्यास भाग पाडू असा इशाराही दिला आहे. महंत जितेंद्र महाराज यांनी ई-मेलद्वारे विनंती केली आहे. संजय राठोड यांच्याबद्दल ज्या काही ऑडिओ क्लिप व्हायरल झाल्या आहे, त्याबद्दल सत्य बाहेर येत नाही तोपर्यंत त्यांचा राजीनामा घेऊ नये, अशी विनंती जितेंद्र महाराज यांनी केली आहे. तसंच, जर वनमंत्री संजय राठोड यांचा मुख्यमंत्री उद्धव ठाकरे यांनी राजीनामा घेतला तर पोहरादेवी गडावरून राठोड यांना शिवसेनेच्या आमदारकीचा ही राजीनामा द्यायला लावू, असंही जितेंद्र महाराज यांनी म्हटलं आहे. दरम्यान, शिवसेनेनं संजय राठोड यांच्यावर कारवाईचा निर्णय घेतला आहे. संजय राठोड यांनी मुख्यमंत्री उद्धव ठाकरे यांची भेटीसाठी वेळ मागितली होती, पण त्यांनी ती नाकारली आहे. त्यामुळे संजय राठोड यांना राजीनामा द्यावा लागणार हे स्पष्ट झाले आहे. अर्थसंकल्पीय अधिवेशनाच्या पार्श्वभूमीवर आज राज्य मंत्रिमंडळाची बैठक होणार आहे. या बैठकीपूर्वी वनमंत्री संजय राठोड यांनी शिवसेनेचे पक्षप्रमुख आणि मुख्यमंत्री उद्धव ठाकरे यांची भेट मागितली होती पण मुख्यमंत्र्यांनी ही भेट नाकारली आहे. त्यामुळे संजय राठोड यांना आता राजीनामा द्यावा लागणार हे स्पष्ट झाले आहे. पुढील काही तासांतच संजय राठोड त्यांचा वनमंत्रिपदाचा राजीनामा देण्याची शक्यता आहे.

• Follow us on