)
मुंबई, 14 ऑक्टोबर : अंधेरीच्या पोटनिवडणुकीमध्ये जवळपास रोजच नवनवे ट्विस्ट येत आहेत. उमेदवारी अर्ज दाखल करण्याच्या शेवटच्या दिवशी शिवसेना उद्धव बाळासाहेब ठाकरे पक्षाकडून ऋतुजा लटके आणि भाजपकडून मुरजी पटेल यांनी अर्ज दाखल केला. ऋतुजा लटके यांचा उमेदवारी अर्ज दाखल करताना महाविकासआघाडीने शक्तीप्रदर्शन केलं. शिवसेना नेते आदित्य ठाकरे, अनिल परब यांच्यासह काँग्रेस आणि राष्ट्रवादीचे नेतेही लटकेंचा अर्ज दाखल करताना उपस्थित होते. ऋतुजा लटके यांनी उमेदवारी अर्ज दाखल केला असला तरी उद्धव ठाकरे यांनी या निवडणुकीसाठी प्लान बी तयार ठेवला आहे. ठाकरेंच्या या निर्णयामुळे ऋतुजा लटके या टेन्शनमध्ये असण्याची शक्यता आहे. अंधेरी पूर्वच्या या पोटनिवडणुकीमध्ये शिवसेना उद्धव बाळासाहेब ठाकरे पक्षाकडून दोन उमेदवार रिंगणात उतरले आहेत. ऋतुजा लटके यांच्यासह संदीप नाईक यांनीही शिवसेना उद्धव बाळासाहेब ठाकरे पक्षाकडून अर्ज केला आहे. संदीप नाईक ये युवासेनेचे पदाधिकारी आहेत, तसंच ते शिवसेनेचे अंधेरीमधले माजी नगरसेवकही होते. ऋतुजा लटके यांच्या अर्जाच्या तपासणीवेळी काही अडचण आली तर संदीप नाईक अर्ज मागे घेतील, असं अनिल परब यांनी सांगितलं आहे. ‘उद्धव ठाकरे रमेश लटकेंना घरात प्रवेशही देत नव्हते, त्यांना सतत..’, नितेश राणेंचे गंभीर आरोप लटकेंचा राजीनामा वादात ऋतुजा लटके यांच्या राजीनाम्यावरूनही बराच वाद निर्माण झाला होता. अंधेरीच्या पोटनिवडणुकीत विजय झाला, तर आपला राजीनामा मंजूर करा, असा अर्ज लटके यांनी मुंबई महापालिकेकडे सप्टेंबर महिन्यात केला होता. लटकेंचा राजीनामा अटींसह असल्यामुळे त्यांना पुन्हा 3 ऑक्टोबरला राजीनामा द्यावा लागला. हा राजीनामा स्वीकारला जात नसल्यामुळे त्यांनी मुंबई हायकोर्टात धाव घेतली, अखेर हायकोर्टाने लटके यांचा राजीनामा घ्यायचे आदेश मुंबई महापालिकेला दिले. ऋतुजा लटके या मुंबई महापालिकेच्या कर्मचारी होत्या. नियमानुसार सरकारी कर्मचाऱ्याला निवडणूक लढवण्यासाठी नोकरीचा राजीनामा द्यावा लागतो. शिवसेना आमदार रमेश लटके यांचं निधन झाल्यामुळे अंधेरीची पोटनिवडणूक होत आहे. 3 नोव्हेंबरला या निवडणुकीचं मतदान आहे, तर 6 नोव्हेंबरला मतमोजणी होणार आहे. महाराष्ट्रामध्ये झालेल्या राजकीय नाट्यानंतर ही पहिलीच निवडणूक होत आहे. काँग्रेस-राष्ट्रवादीने या निवडणुकीमध्ये शिवसेना उद्धव बाळासाहेब ठाकरेंच्या उमेदवाराला पाठिंबा दिला आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
