'काली' पोस्टरनंतर लीना मणिमेकलाईचं नवं ट्विट; आता पोस्ट केला 'भगवान शिव-पार्वती'चा वादग्रस्त फोटो

मुंबई 07 जुलै : गेल्या काही दिवसांपासून देशात ‘काली’ (Kaali) या डॉक्युमेंट्री सिनेमाच्या पोस्टरवरून वाद सुरू आहे. निर्माती लीना मणिमेकलाईच्या (Leena Manimekalai) काली या डॉक्युमेंट्री सिनेमात काली माता सिगरेट ओढताना दाखवण्यात आली होती. तसंच तिच्या हातात LGBTQचा झेंडादेखील दाखवण्यात आला. या पोस्टरमुळे राजकारण तापलं असून, संपूर्ण देशातून त्याचा विरोध होतोय. याप्रकरणी दिल्ली, मुंबई आणि यूपीमध्ये लीना मणिमेकलाईविरोधात गुन्हेही दाखल करण्यात आले आहेत. दरम्यान, हा वाद सुरूच असताना लीनाने आणखी एक वादग्रस्त ट्विट केलंय. लीनाच्या या ट्विटवरून पुन्हा तिच्यावर टीका होत आहे. तिने शेअर केलेल्या फोटोमध्ये भगवान शिव आणि माता पार्वतीची भूमिका करणारे कलाकार धूम्रपान करताना दाखवले आहेत. ‘Elsewhere’, असं कॅप्शन देत लीना मणिमेकलाईने हा फोटो ट्विट केलाय. यावर ट्विटर युजर्सनी तिच्यावर जोरदार टीका केली आहे. ‘लीना फक्त द्वेष पसरवत आहे,’ असं एका युजरने म्हटलंय. तर ‘तिने हिंदू धर्माचा (Hindu Religion) अपमान करणं थांबवावं,’ असं दुसऱ्या एका युजरने म्हटलंय. या संदर्भात आज तकने वृत्त दिलंय. Hansal Mehta: 'कंगनासोबत काम करणं आयुष्यातली सगळ्यात मोठी चूक'; प्रसिद्ध दिग्दर्शकाचा मोठा खुलासा लीना मणिमेकलाईने ट्विट केलेल्या या फोटोवर राजकारण्यांच्या प्रतिक्रिया येऊ लागल्या आहेत. यावर भाजपा नेते शहजाद पूनावाला यांनी प्रतिक्रिया दिली आहे. ते म्हणाले, हा सर्जनशील अभिव्यक्तीचा विषय नाही, तर ही मुद्दाम चिथावणी देणारी बाब आहे. हिंदूंना शिव्या देणं म्हणजेच धर्मनिरपेक्षता आहे का? हिंदू धर्माचा अपमान करणं म्हणजेच उदारमतवाद आहे का?, असे सवाल त्यांनी उपस्थित केलेत. तसंच डावे पक्ष, काँग्रेस, टीएमसी लीनाला पाठिंबा देत आहेत, म्हणून तिला अशा पोस्ट टाकण्यास प्रोत्साहन मिळतंय, असंही शहजाद पूनावाला म्हणाले.

Elsewhere…. pic.twitter.com/NGYFETMehj

— Leena Manimekalai (@LeenaManimekali) July 7, 2022

‘काली’ या डॉक्युमेंट्रीचं पोस्टर कॅनडामध्ये आयोजित करण्यात आलेल्या ‘अंडर द टेंट’ या प्रोजेक्ट अंतर्गत प्रदर्शित करण्यात आलं. कॅनडामधील भारतीय उच्चायोगाच्या वतीने पत्रक काढून या पोस्टरचा निषेध करण्यात आला. पोस्टरमध्ये असलेला आक्षेपार्ह कंटेंट काढून टाकण्याची मागणी करण्यात आली होती. त्यानंतर कॅनडाच्या ज्या म्युझिअममध्ये पोस्टर प्रदर्शित करण्यात आलं होतं तिथल्या लोकांनी हिंदूंच्या भावना दुखावल्याबद्दल खेद व्यक्त करत माफी मागितली होती. Kaali पोस्टरला दणका; भारताच्या विनंतीवर ट्विटरची कारवाई, पोस्टर हटवले कोण आहे लीना? तमिळनाडू राज्यातील मदुराई शहराच्या दक्षिण भागात एका छोट्या गावात लीनाचा जन्म झाला. महाराजापुरम हे तिच्या गावाचं नाव आहे. तिचे वडील कॉलेजमध्ये लेक्चरर होते. त्यांच्या गावात अशी प्रथा होती, की एखादी मुलगी वयात आल्यानंतर काही वर्षांमध्येच त्यांचं लग्न त्यांच्या मामासोबत लावून द्यायचं. लीनाचंही लग्न तिच्या मामासोबत ठरलं होतं. मात्र, लग्नाची तयारी सुरू असतानाच ती घर सोडून चेन्नईला पळून गेली. त्यानंतर तिने इंजिनीअरिंग आणि आयटी क्षेत्रातसह अनेक ठिकाणी नोकऱ्या केल्या आणि नंतर ती फिल्म इंडस्ट्रीत दाखल झाली. ‘काली’ची निर्माती असलेली लीना मणिमेकलाई या आधीही सिनेमांवरुन वादाच्या भोवऱ्यात अडकली आहे. या पूर्वीही आपल्या डॉक्युमेंट्री फिल्म्सच्या ती चर्चेचा विषय ठरली होती. देवदासी प्रथेवर बनवलेली माथम्मा (Mathamma) या डॉक्युमेंट्रीवर अनेकांनी आक्षेप नोंदवला. दलित महिलांवर होणाऱ्या हिंसेबाबत बनवलेली पराई (Parai) आणि धनुषकोडीमधील मच्छिमारांवर बनवलेली सेंगदाल (Sengadal) या डॉक्युमेंट्री फिल्म्समुळे निर्माती मणिमेकलाई वादाच्या भोवऱ्यात सापडली होती.