)
मुंबई, 05 नोव्हेंबर : तरूणींचा क्रश असलेला मराठमोळा अभिनेता ललित प्रभाकर चा नुकताच मीडियम स्पायसी हा सिनेमा प्रेक्षकांच्या भेटीला आला होता. एक वेगळा विषय यानिमित्तानं प्रेक्षकांना पाहायला मिळाला. मीडियम स्पायसीनंतर ललितचा नवा सिनेमा प्रेक्षकांना पाहायला मिळणार आहे. झिम्माच्या दमदार यशानंतर हेमंत ढोमे प्रेक्षकांसाठी नवी मेजवानी घेऊन आला आहे. हेमंत ढोमे दिग्दर्शित सनी हा सिनेमा प्रेक्षकांच्या भेटीला येत आहे. अभिनेता ललित प्रभाकर या सिनेमात सनीच्या मुख्य भूमिकेत आहे. ललितचा नवा अंदाज या सिनेमात पाहायला मिळतोय. दरम्यान सिनेमाचा ट्रेलर नुकताच प्रदर्शित झाला आहे. 18 नोव्हेंबरला सिनेमा प्रदर्शित होणार आहे. घरापासून दूर राहिलेल्या प्रत्येकाची गोष्ट सनी या सिनेमातून पाहायला मिळणार आहे. विविध भावनांनी भरलेला हा ट्रेलर पाहून प्रेक्षकांची ‘सनी’ची कहाणी जाणून घेण्याची उत्सुकता अधिकच वाढली आहे. ललित प्रभाकर, चिन्मय मांडलेकर, क्षिती जोग, अभिषेक देशमुख, अमेय बर्वे हे कलाकार सिनेमात प्रमुख भूमिकेत आहेत. तर इरावती कर्णिक यांनी सिनेमाचं लेखन केलं आहे. सिनेमाच्या ट्रेलरवरून लक्षात येते की कूल, बिनधास्त, स्वच्छंदी आयुष्य जगणारा असा सनी आहे. पण जेव्हा शिक्षणासाठी घरापासून दूर परदेशात जाण्याची वेळ येते तेव्हा त्याची स्वावलंबी होण्यासाठीची धडपड सिनेमातून मांडण्यात आली आहे. हेही वाचा - वादळवाट ते सनी! तब्बल 18 वर्ष एकत्र काम करतेय ही जोडी, लवकरच येतोय नवा सिनेमा
त्याचप्रमाणे घरातून हवी ती वस्तू मिळालेल्या ‘सनी’ला परदेशातील परिस्थितीशी जुळवून घेताना कसा त्रास होतो. अनेक गोष्टींना सामोरे जात असतानाच त्याला घरच्यांचे महत्व कळत आहे. लांब गेल्यावरच जवळचं सापडतं, असाच काहीसा अनुभव ‘सनी’ला येत असल्याचे दिसतेय. ‘सनी’ने अशी कोणती चूक केली, ज्याची त्याला अशी शिक्षा भोगावी लागत आहे, ‘सनी’च्या मनातली तगमग नेमकी कसली आहे, सनी पुन्हा मायदेशी येणार की परदेशातच राहणार, अशा अनेक प्रश्नांची उत्तरे आपल्याला सिनेमा पाहिल्यानंतर कळणार आहे.
‘सनी’बद्दल दिग्दर्शक हेमंत ढोमे म्हणतात, ‘लांब गेल्यावरच काही गोष्टींची किंमत कळते, जाणीव होते आणि याच अनुभवातून माणूस सर्वार्थाने प्रगल्भ होतो. ‘सनी’चा अनुभव मी स्वतःही घेतला आहे. मी स्वतः शिक्षणासाठी परदेशात असल्याने ही कथा माझ्याही खूप जवळची आहे. खरंतर कधीतरी घरापासून दूर राहिलेल्या प्रत्येकाची ही गोष्ट आहे. प्रत्येकाने कुटुंबासोबत पाहावा, असा ‘सनी’ आहे. आयुष्यातील गांभीर्य जाणून न घेता, बिनधास्त जगणाऱ्या ‘सनी’ला परदेशात गेल्यावर आयुष्याची, नात्यांची किंमत कळते. विनोदी, धमाल आणि तरीही भावनिक असा हा सिनेमा आहे. ज्याप्रमाणे प्रेक्षकांनी ‘झिम्मा’वर प्रेम केले तसेच प्रेम प्रेक्षक ‘सनी’वरही करतील, याची मला खात्री आहे’.
+6
फोटो
