आधी उशीने तोंड दाबलं अन् शाहबादने कुसूमच्या शरीराची केली चाळण; आणखी एक भयाण घटना 

कोरबा, 27 डिसेंबर : छत्तीसगडमधील कोरबा जिल्ह्यात लव्ह ट्रँगलमधून हत्येची घटना समोर आली आहे. शनिवारी कोरबा येथील पंप हाऊस कॉलनीत स्क्रू ड्रायव्हरने वार करुन तरुणीची हत्या करण्यात आली. याप्रकरणी आता धक्कादायक खुलासा झाला आहे. शॉर्ट पोस्टमॉर्टम रिपोर्टनुसार, तरुणीच्या मानेवर, छातीवर आणि शरीराच्या इतर भागात स्क्रू ड्रायव्हरसारख्या धारदार वस्तूने 26 वार करण्यात आले होते. तिचा प्रियकर शाहबाद खान याने तिची हत्या केली होती. पोलीस त्याचा शोध घेत आहेत. काय आहे संपूर्ण प्रकरण - नील कुसुम या तरुणीला मारण्यासाठी शाहबाद खान विमानाने गुजरातहून कोरबा येथे आला होता. तरुणीचे दुसरे कोणावर तरी प्रेम आहे या संशयावरून त्याने तिची हत्या केली. फरार शाहबादच्या शोधात पोलिसांची 4 पथके गुंतली आहेत. नातेवाइकांनी सांगितले की, नील कुसुम हिने मदनपूर (करताळा) शाळेत 9वी ते 12वी पर्यंतचे शिक्षण घेतले होते. आरोपी शाहबाद हा जशपूरचा रहिवासी आहे. तसेच तो कंडक्टर आहे. तरुणी ज्या बसमधून दररोज प्रवास करत असे, त्या बसचा तो कंडक्टर होता. दोघांमध्ये संवाद वाढू लागला आणि प्रेमसंबंध निर्माण झाले. शालेय शिक्षण पूर्ण केल्यानंतर नील कुसुम घरीच राहून पुढील शिक्षणाची तयारी करत होती. तिच्या वडिलांनी सांगितले की, यावर्षी तिला कॉलेजमध्ये प्रवेश घ्यायचा होता, परंतु काही कारणास्तव त्याला यंदा प्रवेश मिळू शकला नाही, म्हणून 2023 मध्ये प्रवेश घेण्याची तयारी होती. दरम्यान, नील कुसुमने तिचा प्रियकर शाहबादसोबतचा बोलणेही हळूहळू कमी केले. सध्या शाहबाद गुजरातमधील एका कंपनीत काम करत होता. तेथून तो जेव्हा-जेव्हा मुलीला फोन करण्याचा प्रयत्न करत असे, तेव्हा तिचा मोबाईल अनेकदा व्यस्त असायचा. त्यामुळे तिचे आणखी कुण्या तरुणाशीही अफेअर असल्याचा शाहबादला संशय होता. त्याला पाथळगाव येथील आशिष केरकेट्टा याचे कुसुमशी प्रेमसंबंध असल्याचा संशय होता. याबाबत त्याने कुसुमला अनेकदा जीवे मारण्याची धमकीही दिली होती. आशिष हा कुसुमचा दूरचा नातेवाईक होता आणि तो तिच्या घरी वारंवार येत असे. कुसुमने विश्वासघात केला असे शाहबाद वाटले आणि त्याने तिला जावे मारण्याची योजना आखली. कुसुमच्या हत्येची पूर्ण तयारी करून तो गुजरातहून विमानाने कोरबाला पोहोचला होता. येथे आल्यानंतर त्याने कुसुमशी संपर्क साधला. 24 डिसेंबर रोजी कुसुमने त्याला तिच्या घरी बोलावले. याठिकाणी शाहबादने प्रेमाचे वचन देऊन तिच्याशी आधी शारीरिक संबंध ठेवले, त्यानंतर सोबत आणलेल्या स्क्रू ड्रायव्हरने तिच्या अंगावर 26 हून अधिक ठिकाणी हल्ला केला. कुसुम आरडाओरडा करू नये म्हणून त्याने उशीने तिचे तोंड दाबले होते. तसेच घटनेनंतर आरोपी तरुणाने मोबाईल बंद करून तेथून पळ काढला. तपासादरम्यान पोलिसांना खोलीतून विस्कळीत अवस्थेत मुलीचे कपडे आणि आक्षेपार्ह वस्तूही सापडल्या. सीएसपी विश्वदीपक त्रिपाठी यांनी सांगितले की, बुधराम पन्ना हे त्यांच्या कुटुंबासह पंप हाउस कॉलनीतील एम-271 या निवासस्थानी राहतात. त्यांची पत्नी डीएव्ही शाळेत आया म्हणून काम करते. शनिवारी शाळेचे वार्षिक कार्यक्रम होते, त्यासाठी आई आपल्या 18 वर्षांचा मुलगा नितेशसोबत पहाटे लवकर निघून गेली होती. बुधराम पन्ना हे मजुरीचे काम करतात. त्यामुळे तोसुद्धा कामावर निघून गेला होता. हेही वाचा -  ओळखीनंतर Whatsapp वर बोलणं सुरू, प्रलोभनं दाखवून शरीरसंबंध, तरुणीचा पोलिसावर गंभीर आरोप नील कुसुम पन्ना ही 20 वर्षीय तरुणी घरात एकटीच होती. सकाळी 11 वाजता आईला शाळेत सोडल्यानंतर मुलगा नितेश घरी पोहोचला तेव्हा समोरचा दरवाजा आतून बंद दिसला. अनेकवेळा फोन करूनही बहिणीने प्रतिसाद न दिल्याने नितेश घराच्या मागील बाजूस पोहोचला. मागचा दरवाजा उघडा होता. तेथून आत प्रवेश केला असता खोलीत बहिणीचा मृतदेह पडलेला दिसला. तिच्या चेहऱ्यावर एक उशी ठेवली होती. भावाने तत्काळ वडिलांना फोन करून घटनेची माहिती दिली. वडील बुधराम यांनी तातडीने घरी पोहोचून मुलीचा मृतदेह पाहून पोलिसांना माहिती दिली. सिटी कोतवाली टीआय रुपक शर्मा यांनी दिलेल्या माहितीनुसार, आरोपीचा जवळपास शोध लागला आहे. घटनास्थळी मिळालेल्या, मोबाईल आणि व्हॉट्सअॅप कॉल डिटेल्सवर सापडलेल्या पुराव्यांवरून सुगावा लागला असून यावरुन हे प्रकरण लव्ह ट्रँगलमधून ही हत्या झाल्या आहे, असे वाटते आहे. त्यांनी सांगितले की, घटनेच्या दोन दिवस आधी गुजरातमधून आरोपी विमानाने रायपूरला आला होता. यानंतर बसने तो कोरबा येथे गाठले. तो शहरातील एका हॉटेलमध्ये थांबला होता. व्हॉट्सअॅप कॉलिंगद्वारे तो तरुणीच्या संपर्कात होता. त्याच्या सांगण्यावरून तरुणीने तिचे आई-वडील आणि भाऊ बाहेर असताना त्याला घरी बोलावले. यानुसार तिथे आल्यावर आरोपी तरुणाने तिची हत्या केली आणि त्यानंतर तो पळून गेला. पोलिसांनी त्याच्या जशपूर येथील घरावर छापा टाकला, तो तेथे सापडला नाही. पोलिसांचे पथक संभाव्य ठिकाणी त्याचा शोध घेत आहेत.

• Follow us on