बोलण्यावर ताबा ठेवा नाहीतर...; सविस्तर वाचा तुमचं आजचं राशिभविष्य

आज दिनांक 11 जानेवारी 2023 वार बुधवार. आज पौष कृष्ण चतुर्थी. आज चंद्र सिंह राशीतून भ्रमण करेल. पाहुया आजचे बारा राशींचे राशी भविष्य.

मेष

आज जरासे आत्मपरीक्षण करा. कटू बोल हानी करू शकतात. चंद्र पंचम स्थानातून संततीसाठी विशेष कार्य करील. संतती आनंदी राहील. गुरू अध्यात्मिक बाबीत रस निर्माण करेल. दिवस शुभ.

वृषभ

आज घर आणि आई वडील ही तुमची प्राथमिकता राहील. विशेष स्वच्छता, सजावट, खरेदी यात वेळ घालवाल. एकूण दिवस हा तुमच्यासाठी, कुटुंबासाठी वेळ देण्याचा आहे. शुभ दिवस.

मिथुन

आज मन काहीसे अस्थिर राहील. अष्टम स्थानावरील ग्रह मानसिक द्वंद्व निर्माण करतील. प्रकृतीचे त्रास वाढतील. व्यय मंगळ आहे खर्च आणि उत्पन्न याचा मेळ लागणार नाही. बंधू भेट आणि प्रवास संभवतो. मध्यम दिवस.

कर्क

आज धन कुटुंब आणि वाणी स्थानावरील चंद्र स्वभावात आणि बोलण्यात विशेष गोडवा आणेल. कुटुंबात धार्मिक कार्यक्रम होतील. आर्थिक लाभ संभवतो. शुभ दिवसाचे फळ मिळेल.

सिंह

आज वैवाहिक जीवनात सुख तसेच कुटुंबात काही शुभ घटना घडतील. शनी चंद्र षडाष्टक आहे. मनात घालमेल होत असतानादेखील इतर ग्रह मार्ग दाखवतील. गुरू कृपा होईल. दिवस शुभ.

कन्या

संतती चिंता, घरामध्ये काहीसे ताणाचे वातावरण असा हा दिवस आहे. व्यय चंद्र आर्थिक बाबीत काळजी लावेल. जपून खर्च करा. अष्टम राहू प्रकृती जपा असे सांगत आहे. दिवस मध्यम.

तूळ

अनपेक्षित घडामोडी, मित्रमैत्रिणींची भेट किंवा संपर्क आणि संततीसाठी विशेष घटना असा हा दिवस आहे. कामाचा लाभ मिळेल. आर्थिकदृष्ट्या चांगला दिवस.

वृश्चिक

आज ऑफिसमध्ये जास्तीची जबाबदारी येईल. वरिष्ठ अवलंबून राहतील. तिथे वेळ गेल्यामुळे घरामध्ये ताण निर्माण होणार नाही, याची काळजी घ्या. वैवाहिक जीवनात कलह टाळा. दिवस बरा.

धनू

घरामध्ये शुभ घटना, प्रवास, धार्मिक स्थळांना भेट असा हा दिवस आहे. भाग्य चंद्र दोन-तीन दिवसापासून जाणवणारा ताण दूर करेल. आर्थिक लाभ तसेच प्रकृती उत्तम राहील. शुभ दिवस.

मकर

आज सर्व तऱ्हेने जपून राहण्याचा दिवस आहे. राशीतील शनी आणि अष्टम चंद्राचा मानसिक स्थितीवर परिणाम होईल. बुध शुक्र व्यवसायात मदत करतील. पण एकूण जपून रहा. मध्यम दिवस.

कुंभ

व्ययस्थ ग्रह गोचर अनुसार काळजीचे वातावरण राहील. वैवाहिक जीवनात कुरबुरी असतील. मात्र फारसे अवघड जाणार नाही. गुरू मदत करील. व्यवसाय चांगला राहील. दिवस बरा.

मीन

प्रकृती आणि सामाजिक जीवनात कुरबुरी सुरू असतील तर आज जपून रहा. आर्थिक घडामोडी, निर्णय लांबणीवर टाकण्याचा प्रयत्न करा. भावंडाना त्रास होण्याचा काळ आहे. काळजी घ्या. दिवस मध्यम.

शुभम भवतू!!