अजितदादांकडून सुप्रिया सुळेंचंं अभिनंदन
पुणे, 10 जून : अखेर राष्ट्रवादीचे अध्यक्ष शरद पवार यांनी भाकरी फिरवली. राष्ट्रवादीच्या 24 व्या वर्धापन दिनी त्यांनी मोठी घोषणा केली. राष्ट्रवादीच्या कार्यकारी अध्यक्षपदाची जबाबदारी सुप्रिया सुळे आणि प्रफुल्ल पटेल यांच्याकडे सोपवण्यात आली आहे. मात्र दुसरीकडे अजित पवार यांच्याकडे कोणतीही जबाबदारी सोपवण्यात आलेली नाहीये. शरद पवार यांनी सुप्रिया सुळे यांच्या नावाची कार्यकारी अध्यक्ष म्हणून घोषणा करताच अजित पवार यांनी ट्विट करत सुप्रिया सुळे यांना शुभेच्छा दिल्या आहेत.
नेमकं काय म्हणाले अजित पवार? ‘राष्ट्रवादी काँग्रेस पक्षाच्या 24 व्या वर्धापन दिनी आदरणीय शरदचंद्र पवार साहेबांच्या मार्गदर्शनाखाली खासदार प्रफुल्लभाई पटेल आणि खासदार सुप्रियाताई सुळे यांची पक्षाच्या कार्यकारी अध्यक्षपदी निवड करण्यात आली. तसंच खासदार प्रफुल्लभाई पटेल, खासदार सुप्रियाताई सुळे, खासदार सुनिल तटकरे, डॉ. योगनानंद शास्त्री, के.के. शर्मा, पी.पी. महोम्मद फैजल, नरेंद्र वर्मा, जितेंद्र आव्हाड, एस. आर. कोहली, नसीम सिद्दकी या सहकाऱ्यांना पक्षांतर्गत विविध महत्त्वाच्या जबाबदाऱ्या देण्यात आल्या आहेत. या सर्व सहकाऱ्यांचे मन:पूर्वक अभिनंदन!’ ‘आदरणीय साहेबांनी टाकलेला विश्वास सार्थ ठरवत दिलेल्या जबाबदाऱ्या सर्व सहकारी यशस्वीपणे पार पाडतील, असा विश्वास आहे. आदरणीय शरदचंद्र पवार साहेबांच्या नेतृत्व आणि मार्गदर्शनाखाली ‘हृदयात महाराष्ट्र… नजरे समोर राष्ट्र…’ हा विचार घेऊन रौप्य महोत्सवी वर्षात पदार्पण करणारा राष्ट्रवादी काँग्रेस पक्ष देशाच्या आणि राज्याच्या जडण-घडणीत मोलाचं योगदान देईल. राष्ट्रवादी काँग्रेस पक्षाच्या प्रत्येक कार्यकर्ता, पदाधिकारी याच ध्येयानं कामं करतील हा विश्वास आहे. नवनिर्वाचित पदाधिकाऱ्यांचं पुन:श्च अभिनंदन!’ असं ट्विट अजित पवार यांनी केलं आहे.