फाईल फोटो
नवी दिल्ली, 19 एप्रिल : आता भारताने लोकसंख्येच्या बाबतीत चीनला मागे टाकले आहे. युनायटेड नेशन्स पॉप्युलेशन फंड (UNFPA) च्या डेटामध्ये महत्त्वाची माहिती समोर आली आहे. यामध्ये असे दिसून येते की भारताने चीनला मागे टाकून 142.86 कोटी लोकसंख्येसह जगातील सर्वाधिक लोकसंख्या असलेला देश बनला आहे. UNFPA नुसार चीनची लोकसंख्या 142.57 कोटी आहे. UNFPA च्या ‘द स्टेट ऑफ वर्ल्ड पॉप्युलेशन रिपोर्ट, 2023’ हा अहवाल प्रसिद्ध केला. ‘8 बिलियन लाइव्स, इनफिनिट पॉसिबिलिटीज: द केस फॉर राइट्स एंड चॉइस’ असे या अहवालाचे शिर्षक आहे. अहवालातील ताजी आकडेवारी ‘डेमोग्राफिक इंडिकेटर्स’ या श्रेणीमध्ये देण्यात आली आहे. 1950 पासून जेव्हा संयुक्त राष्ट्रांनी लोकसंख्येचा डेटा गोळा करणे आणि प्रसिद्ध करणे सुरू केले तेव्हापासून भारताच्या लोकसंख्येने चीनला मागे टाकण्याची ही पहिलीच वेळ आहे. UNFPA च्या मीडिया सल्लागार अण्णा जेफरीज म्हणाल्या, ‘हो, भारताने चीनला कधी मागे टाकले हे स्पष्ट नाही.’ जेफरीज म्हणाले, ‘खरेतर दोन्ही देशांची तुलना करणे खूप कठीण आहे. कारण दोन्ही देशांच्या डेटा कलेक्शनमध्ये थोडाफार फरक आहे. ते म्हणाले की, चीनची लोकसंख्या गेल्या वर्षी उच्चांकावर पोहोचली होती आणि आता ती कमी होऊ लागली आहे, हे या अहवालात स्पष्ट झाले आहे. त्याचबरोबर जरी भारताच्या लोकसंख्येच्या वाढीचा दर 1980 पासून घसरत आहे. तरी भारताची लोकसंख्या सध्या वाढत आहे. याच अर्थ असा की, भारताची लोकसंख्या वाढत आहे पण तिचा दर आता पूर्वीच्या तुलनेत कमी झाला आहे. UNFPA च्या नवीन अहवालानुसार, भारतातील 25 टक्के लोकसंख्या 0 ते 14 वयोगटातील आहे, 18 टक्के लोक 10 ते 19 वयोगटातील, 26 टक्के लोक 10 ते 24 वयोगटातील, 68 टक्के लोक 15 ते 64 वर्षे वयोगटातील आणि 65 वर्षांवरील लोक हे 7 टक्के आहेत. तर चीनमध्ये 17 टक्के लोक हे 0 ते 14 वर्षे, 12 टक्के लोक हे 10 ते 19 वयोगट, 18 टक्के लोक हे 10 ते 24 वर्षे वयोगट, 69 टक्के लोक हे 15 ते 64 वर्षे वयोगट आणि 14 टक्के लोक 65 वर्षांच्या दरम्यान आहेत.