अतिक्रमण हटवण्यासाठी गेलेल्या पथकावर हल्ला
भंडारा, 25 मार्च, नेहाल भुरे : जिल्ह्यातून एक धक्कादायक घटना समोर आली आहे. शासकीय वन जमिनीवरील अतिक्रमण हटविण्यासाठी गेलेल्या वनकर्मचाऱ्यांच्या पथकावर 20 ते 25 अतिक्रमणधारकांनी लाठीकाठी व कुऱ्हाडीने हल्ला केला आहे. तसेच तुमसर वनपरिक्षेत्राधिकाऱ्यांच्या वाहनावर पेट्रोल टाकून वाहन पेटवण्याचा प्रयत्न केला. अतिक्रमण हटवण्यासाठी आलेल्या कर्मचाऱ्यांना शिवीगाळ करत जीवे मारण्याची धमकी देखील देण्यात आली. या घटनेमुळे खळबळ उडाली असून, वनकर्मचाऱ्याचं पथक दहशतीमध्ये आहे. या प्रकरणात आतापर्यंत दहा ते पंधरा व्यक्तिंविरोधात गुन्हा दाखल करण्यात आला आहे. अतिक्रमण हटवण्याच्या सूचना घटनेबाबत अधिक माहिती अशी की, तुमसर वनपरिक्षेत्रांतर्गंत येणाऱ्या बपेरा सहवनक्षेत्रातील मौजा गोंडिटोला (सुकळी) येथील गट क्रमांक 23 व 36/2 मध्ये 20 ते 25 लोकांनी अतिक्रमण केले होते. हे अतिक्रम हटवावे अशी त्यांना वारंवार लेखी आणि तोंडी सूचना देण्यात आली होती. मात्र त्यांनी अतिक्रमण हटवले नाही. उलट त्या ठिकाणी दहशत निर्माण करण्याचा प्रयत्न केला. दरम्यान घटनेच्या दिवशी सोड्या येथील बिटरक्षक डी. ए. कहुळकर, क्षेत्र सहाय्यक यु. के. ढोके, बिट रक्षक ए. जे. वासनिक, डी. जे. उईके, वनरक्षक ए. डी. ठवकर व वनमजूर इमारचंद शिवणे गस्ती करत असतांना त्यांना मौजा गोंडीटोला (सुकळी) गट क्रमांक 23 व 36/2 मध्ये 20 ते 25 व्यक्ती अतिक्रमण करताना निदर्शनास आले. ते ट्रॅक्टरच्या सहाय्याने नागरटी व धुरे बनवत होते. 10 ते 15 व्यक्तिंविरोधात गुन्हा दाखल बिटरक्षक कहुळकर यांनी अतिक्रमणधारकांना ट्रॅक्टर बाहेर काढण्यास सांगितले. मात्र त्यांना शिवीगाळ करून जीवे मारण्याची धमकी देण्यात आली. त्यानंतर वनपरिक्षेत्राधिकारी छगन राहांगडाले शासकीय वाहनाने कर्मचाऱ्यांसह अतिक्रमणस्थळी गेले असता त्याठिकाणी जमाव होता. त्यांनी अतिक्रमण हटवण्यास विरोध केला. तसेच वनकर्मचाऱ्यांच्या पथकावर हल्ला करण्यात आला. या प्रकरणात सिहोरा पोलीस स्टेशनमध्ये 10 ते 15 व्यक्तिंविरोधात गुन्हा दाखल करण्यात आला आहे.