काबुलमध्ये पुन्हा रॉकेट हल्ले, तालिबान सरकारसमोर नवं आव्हान, पाहा VIDEO

काबुल, 16 सप्टेंबर : अफगाणिस्तानमध्ये (Afghanistan) तालिबानची (Taliban) सत्ता आल्यानंतर सर्वसामान्य नागरिकांवर होणाऱ्या हल्ल्यांचं (Attack) प्रमाण वाढत चाललं आहे. काही वेळापूर्वीच अफगाणिस्तानची राजधानी काबुलच्या (Kabul) खैऱ खाना (Khair Khana) भागात रॉकेट हल्ले (Rocket Attack) झाल्याचं वृत्त स्थानिक वृत्तसंस्थेनं दिलं आहे. 'आमराज न्यूज'नं याबाबत एक व्हिडिओ ट्विट केला असून दूर अंतरावर रॉकेट डागले गेल्याचं आणि त्यानंतर आग लागल्याचं त्यात दिसत आहे. या हल्ल्याची जबाबदारी अद्याप कुठल्याही संघटनेनं स्वीकारलेली नाही. मात्र ISIS-K या संघटनेनंच हे हल्ले केले असावेत, असा संशय व्यक्त करण्यात येत आहे. आयसीस-के या संघटनेचा अफगाणिस्तानमधील तालिबानच्या राजवटीला विरोध असून तालिबानी हे शरिया पद्धतीने राज्य चालवत नसल्याचा त्यांचा दावा आहे. तालिबान सत्तेत आल्यानंतर तेथील आयसीस-के ही संघटना अधिक सक्रीय झाली असून तालिबान सरकारला खिंडीत गाठण्याचा प्रयत्न वारंवार केला जात असल्याचं चित्र आहे.

#تازه اصابت چندین راکت در خیرخانه کابل مردم محل این رویداد را به آماج نیوز تایید نموده و می‌گویند که چندین فیر راکت در ساحه سب استیشن برق چمتله کابل اصابت نموده است. تاهنوز در مورد خسارات و تلفات این رویداد جزییاتی در دسترس نیست.#آماج_نیوز pic.twitter.com/19rnIAc5EU

— Aamaj News (@AamajN) September 16, 2021

यापूर्वीही झाले होते हल्ले काबुल विमानतळ अमेरिकेच्या ताब्यात असताना विमानतळ परिसरात जोरदार बॉम्बस्फोट घडवण्यात आला होता. यात काही अमेरिकी सैनिक आणि इतर अनेक सर्वसामान्य नागरिकांचे प्राण गेले होते. या हल्ल्याची जबाबदारी आयसीस-के या संघटनेनंच स्वीकारली होती. त्यानंतर अमेरिकेनं अफगाणिस्तानमधून माघार घेण्याची प्रक्रिया पूर्ण झाली असून आता तालिबान सरकारची स्थापना झाली आहे. तालिबान सरकारला अस्थिर कऱणे आणि तालिबानचा प्रभाव कमी करण्यासाठी कार्यरत असणाऱ्या आयसीसी-के संघटनेनेच हे हल्ले केले असावेत, असा अंदाज आहे. दुसरीकडे तालिबान आणि पंजशीरमधील नॉर्दर्न अलायन्स यांच्यात अजूनही संघर्ष सुरू आहे. तालिबानकडून पंजशीरमधील नागरी वस्तीत हल्ले करण्याच्या घटना यापूर्वी घडल्या आहेत. त्याचं प्रत्युत्तर म्हणून नॉर्दर्न अलायन्सच्या सैनिकांकडून हे हल्ले घडवण्यात आल्याची चर्चादेखील केली जात आहे. या हल्ल्यात किती जण गंभीर आहेत आणि नेमकं काय नुकसान झालं आहे, याचे तपशील अद्याप उपलब्ध झालेले नाहीत. मात्र अफगाणिस्तानात सर्व काही आलबेल नसल्याचंच या घटनेवरून दिसून आलं आहे.