चावी हरवल्यास बाइक सुरू कशी करायची? हा जुगाड वाचवेल संकटातून

मुंबई, 16 जानेवारी : प्रवासासाठी सार्वजनिक वाहतूक व्यवस्थेवर अवलंबून राहण्यापेक्षा अनेक जण टू-व्हीलर अर्थात बाइकला प्राधान्य देतात. बाइकवर अवलंबित्व खूप असतं. त्यामुळे चुकून कधी बाइकची चावी गहाळ झाली, तर हैराण व्हायला होतं. जवळपास मेकॅनिक नसेल तर अडचणी आणखीच वाढतात. अशा अडचणीच्या वेळी एक ट्रिक उपयोगी ठरू शकते. चावीशिवाय बाइक स्टार्ट कशी करता येते, याची माहिती घेऊ या.

बाइकची चावी हरवली तर सर्वप्रथम चावी शोधण्याचा प्रयत्न केला जातो. शोधूनही चावी सापडली नाही आणि जवळपास मेकॅनिक नसेल तर हतबल व्हायला होतं. चावीशिवायदेखील बाइक सुरू होऊ शकते. याला हॉटवायर प्रोसेस असं म्हणतात. सध्याच्या अपडेटेड बाइक मॉडेलमध्ये या प्रोसेसचा वापर करणं वाटतं तितकं सोपं नाही. यासाठी वायरिंग कॅप, स्लीव्ह, इग्निशन वायरिंग सिस्टीम आणि स्पीकर वायरविषयी प्राथमिक माहिती असणं गरजेचं आहे. अन्यथा बाइकचं नुकसान होऊ शकतं. ही प्रक्रिया करताना कोणत्याही बेकायदा गोष्टींचा वापर करणं टाळावं. या गोष्टींची पुरेशी माहिती नसेल तर जोखीम पत्करू नये. त्यापेक्षा चावी शोधणं आणि मेकॅनिक गाठणं केव्हाही श्रेयस्कर.

बाइकमधल वायरिंगची पुरेशी माहिती गरजेची आहे. सध्या डिजिटल गॅजेट्सच्या वापराच्या अनुषंगाने ग्राहकांच्या गरजा पूर्ण करण्यासाठी ऑटोमोबाइल कंपन्यांनी प्रगत तंत्रज्ञानासह बाइक्सचं उत्पादन सुरू केलं आहे. कंपन्या आता बाइकच्या कव्हरमध्ये वायर्सचं जादा बंडल देतात. वायर्सच्या कॅप ओळखता आल्या पाहिजेत. कोणत्याही वायरच्या सुरुवातीला आणि शेवटी कॅप्स दिसतील. या कॅप्सची माहिती असेल तर ही प्रक्रिया जलद होते. स्लीव्ह हा वायर्स जोडणारा एक भाग असतो. स्लीव्हमुळे वायर्सची कनेक्शन विभाजित होतात. बाइकची लॉक सिस्टीम वायर्सवर अवलंबून असते. त्यामुळे चावी योग्य ठिकाणी लावल्यानंतर इंजिन इग्निशनची क्रिया सुरू होते. बाइकच्या हॉटवायर प्रक्रियेत तीन वायर्सची गरज असते. या वायर्स अचूक ओळखल्या तर प्रक्रिया सोपी आणि लवकर होते.

वाचा - CNG कारमध्येही कमी मायलेजची चिंता? मग 'या' Tips तुमच्या कामाच्या

हॉटवायर प्रोसेस करण्यासाठी सर्वप्रथम हँडलबार थोडासा फिरवला तर वायर्सचा बंच दिसेल. त्यानंतर दोन ते तीन कॅप्स किंवा सॉकेट दिसतील. बाइक लेटेस्ट असेल तर वायर्स शोधण्यासाठी जास्त वेळ लागू शकतो. वायर्स शोधणं ही गोष्ट बाइकच्या मॉडेलवर अवलंबून आहे. या वायर्स लाल, हिरवा, निळा, पांढरा, काळा किंवा पिवळा या रंगांच्या असतात. यापैकी इग्निशनची वायर शोधणं महत्त्वाचं आहे. वायर्स शोधताना तीन वायर्स कॅपमधल्या स्लीव्हमध्ये जॉइंट केलेल्या दिसतील. त्यापैकी एक कॅप ही इग्निशनची, तर उर्वरित इतर पार्ट्सच्या असतात. इग्निशनला जोडलेल्या तीन वायर्स सापडतील. लॉकच्या खालच्या बाजूला शोधल्यास या तीन वायर्स सहज सापडतील. या तीन वायर्सचे रंग वेगवेगळे असू शकतात. इग्निशन कॅप सापडल्यावर सॉकेट उघडावं.

यानंतर स्पीकर वायर शोधणं हा कठीण टप्पा असतो. सॉकेट उघडल्यानंतर तीन कनेक्शन दिसतील. त्यातून स्पीकर वायर वेगळी काढावी. त्यानंतर इग्निशन भागाकडे लक्ष द्या. लॉकपासून येणारा हा भाग वेगळा काढा. इतर कोणताही भाग वेगळा काढू नका. त्यानंतर इग्निशन लॉकमुक्त करण्याचा प्रयत्न करा. या वायर्स निर्धास्तपणे हाताळा. यानंतर स्पीकर वायरवर काम करा. या वायरचं रिकनेक्शन इग्निशन सेक्शनकडे नेईल. सॉकेटमध्ये स्पीकर वायर यशस्वीपणे जोडू शकलात, तर बाइक लगेच सुरू होऊ शकते. वायरीचं शेवटचं टोक सॉकेटमध्ये जोडा. यासाठी चार इंचाची वायर बाहेरूनही जोडू शकता. यानंतर तुम्हाला न्यूट्रल इंडिकेटर एलईडी चालू झालेला दिसेल. आता इंजिन सुरू करण्यासाठी इग्निशन रेडी आहे, असं समजावं.

यानंतर स्टार्ट बटण दाबावं. त्यानंतर बाइकमधून आवाज ऐकू येईल. बाइकची बॅटरी डाउन असेल तर स्पार्क होणार नाही. अशा वेळी बाइकला किक मारावी. बाइकचं इंजिन सुरू होईल. अशा पद्धतीने चावीशिवाय बाइक सुरू करता येऊ शकते.