)
मुंबई, 29 नोव्हेंबर: स्मार्टफोन येण्याच्या आधी साधा फोन असल्यापासून ब्ल्यूटूथ हे फीचर मोबाईलमध्ये होतं. दोन फोनमध्ये शेअरिंगसाठी किंवा दुसऱ्या एखाद्या डिव्हाईसला लिंक करण्यासाठी ब्ल्यूटूथचा प्रामुख्यानं वापर केला जातो. मात्र फोनमधील हे फीचर नेहमी चालू ठेवणं किंवा डिस्कव्हरी मोडवर ठेवणं धोकादायक ठरू शकतं. यामुळे हॅकर्स तुमच्या मोबाईलचा ताबा घेऊन त्यातली माहिती मिळवू शकतात. त्याला ब्ल्यूबगिंग असं म्हणतात. या ब्ल्यूबगिंगपासून मोबाईलला कसा धोका असतो व त्यापासून सुरक्षित कसं राहावं, हे आज आपण पाहणार आहोत. मोबाईलमधील हॉटस्पॉट, वाय-फाय तसंच ब्ल्यूटूथ ही फिचर्स दुसऱ्या डिव्हाईस किंवा नेटवकसोबत शेअरिंगसाठी तयार केलेली असतात. त्यांचा वापर करताना योग्य ती काळजी घेतली पाहिजे. नाहीतर तुमचा मोबाईल हॅक होण्याचा धोका असतो. ब्ल्यूबगिंग हा असाच एक हॅकिंगचा प्रकार आहे. यात हॅकर्स तुमचा मोबाईल हॅक करून त्यातली माहिती मिळवण्याचा प्रयत्न करतात. ब्ल्यूटूथ कनेक्शनमार्फत हे हॅकिंग केलं जातं. तुमच्या मोबाईलचा पासवर्ड किंवा इतर माहिती चोरण्याचा प्रयत्न हॅकर्स करतात. त्यासाठी ब्ल्यूटूथ कनेक्शनच्या माध्यमातून मोबाईलपर्यंत पोहोचतात. मग त्यात मालवेअर इन्स्टॉल करतात व मोबाईलचा ताबा मिळवतात. त्यामुळे तुमच्या मोबाईलमध्ये तुम्ही काय करता हे त्यांना कळू शकतं. इतकंच नाही, तर तुमचं फोनवरचं बोलणंही ते ऐकू शकतात. फोनमधले मेसेज ते वाचू शकतात. त्यामुळे इतर महत्त्वाची माहिती त्यांना मिळू शकते. **हेही वाचा:** ‘या’ परवडणाऱ्या SUVची भारतात रेकॉर्ड ब्रेक विक्री; खरेदीसाठी 1 लाखांहून अधिक ग्राहक रांगेत सुरक्षितता कशी बाळगावी? ब्ल्यूबगिंगद्वारे हॅकिंग करण्यासाठी तो हॅकर तुमच्या रेंजमध्ये असावा लागतो. सार्वजनिक ठिकाणीच हे शक्य असतं. त्यामुळे तुम्ही सार्वजनिक ठिकाणी असताना काम झाल्यावर तुमचं ब्ल्यूटूथ बंद करून ठेवू शकता. मात्र चुकून चालू राहिलंच, तर थोड्या वेळातही तुमचं भरपूर नुकसान होऊ शकतं. अनोळखी व्यक्तीसोबत तुमचं ब्ल्यूटूथ कनेक्शन पेअर करू नका. तुमचा मोबाईल व सॉफ्टवेअर नेहमी अपडेट ठेवा. सॉफ्टवेअर किंवा मोबाईलमधील उणिवांचा फायदा हॅकर्स घेतात. तुमचं ब्ल्यूटूथ डिस्कव्हरेबल असेल, तर ते बंद करा. एखाद्या डिव्हाईससोबत ब्ल्यूटूथ पहिल्यांदाच पेअर करणार असाल, तर शक्यतो सार्वजनिक ठिकाणी करू नका. अशा ठिकाणी हॅकर्स लगेच हल्ला करतात. तुम्ही पेअर केलेलं दुसरं एखादं मोबाईलला जोडलेलं डिव्हाईस हरवलं असेल, तर मोबाईलमधून त्याचं पेअरिंग लगेचच बंद करावं. यामुळे तुमचा मोबाईल सुरक्षित राहील.
ब्ल्यूबगिंगप्रमाणेच Bluesnarfing आणि Bluejacking द्वारेही मोबाईलमधला डेटा चोरता येऊ शकतो. त्यामुळे मोबाईल वापरताना त्याच्या सुरक्षेबाबतही आवश्यक ती खबरदारी घेणं जरुरी असतं.
+6
फोटो
