IPL 2022 : CSK चा अखेर विजय, दुबे-उथप्पाच्या वादळाचा RCB ला तडाखा

नवी मुंबई, 12 एप्रिल : आयपीएल 2022 मध्ये (IPL 2022) अखेर चेन्नई सुपर किंग्सचा पहिला विजय झाला आहे. सीएसकेने या सामन्यात आरसीबीचा (CSK vs RCB) 23 रनने पराभव केला आहे. पहिल्या चार मॅच गमावल्यानंतर चेन्नईचा हा पहिलाच विजय आहे. चेन्नईने दिलेल्या 217 रनच्या आव्हानाचा पाठलाग करताना आरसीबीला 20 ओव्हरमध्ये 9 विकेट गमावून 193 रन करता आले. मॅक्सवेलने 11 बॉलमध्ये 26, शाहबाज अहमदने 27 बॉलमध्ये 41, सुयश प्रभुदेसाईने 18 बॉलमध्ये 34 आणि दिनेश कार्तिकने 14 बॉलमध्ये 34 रनची खेळी केली, पण तरीही आरसीबीला या आव्हानाचा पाठलाग करता आला नाही. सीएसकेकडून महीश तीक्षणाने सर्वाधिक 4 विकेट घेतल्या, तर रवींद्र जडेजाला 3 विकेट मिळाल्या. मुकेश चौधरी आणि ड्वॅन ब्राव्होला 1-1 विकेट घेण्यात यश आलं. आरसीबीविरुद्धच्या सामन्यात पहिले बॅटिंग करणाऱ्या सीएसकेने 20 ओव्हरमध्ये 4 विकेट गमावून 216 रन केल्या. शिवम दुबेने (Shivam Dube) 46 बॉलमध्ये नाबाद 95 रन केले, यात 5 फोर आणि 8 सिक्सचा समावेश होता. उथप्पाने (Robin Uthappa) 50 बॉलमध्ये 88 रनची खेळी केली. उथप्पाने 9 सिक्स आणि 4 फोर मारले. आरसीबीकडून वानिंदु हसरंगाला 2 आणि जॉश हेजलवूडला 1 विकेट घेण्यात यश आलं. या सामन्यात आरसीबाचा कर्णधार फाफ डुप्लेसिसने टॉस जिंकून पहिले बॉलिंगचा निर्णय घेतला, यानंतर चेन्नईची सुरूवात अत्यंत खराब झाली. ऋतुराज गायकवाड आणि मोईन अली स्वस्तात आऊट झाले, त्यामुळे चेन्नईची अवस्था 6.4 ओव्हरमध्ये 36/2 अशी झाली होती, पण उथप्पा आणि दुबे यांच्यात 73 बॉलमध्ये 165 रनची पार्टनरशीप झाली. सीएसकेने मोसमातला पहिला विजय मिळवल्यामुळे पॉईंट्स टेबलमध्ये ते नवव्या क्रमांकावर पोहोचले आहेत, तर मुंबई इंडियन्स आता शेवटच्या म्हणजेच 10व्या क्रमांकावर आहे. दुसरीकडे आरसीबी पाचव्या क्रमांकावर कायम आहे.

• Follow us on