IPL 2022 : 'चांगल्या कामगिरीसाठी तुम्ही...' पांड्या - हुड्डा वादावर गौतम गंभीरनं सोडलं मौन

मुंबई, 23 मार्च : आयपीएल 2022 साठी झालेल्या ऑक्शनंतर लखनऊ सुपर जायंट्स (Lucknow Super Giants) टीममधील एक जोडी चर्चेत आहे. आयपीएल स्पर्धेत पहिल्यांदाच सहभागी झालेल्या लखनऊच्या टीमनं कृणाल पांड्या (Krunal Pandya) आणि दीपक हु़ड्डा (Deepak Hooda) या दोन ऑल राऊंडर्सना खरेदी केले आहे.  कृणाल आणि दीपक दोघंही यापूर्वी बडोद्याच्या टीमकडून खेळले होते. त्यावेळी त्यांच्यात चांगलाच वाद झाला होता.

लखनऊ टीमचा मेंटॉर गौतम गंभीरनं (Gautam Gambhir) टीममधील खेळाडूच्या वादावर पहिल्यांदाच प्रतिक्रिया दिली आहे. गंभीर म्हणाला की, 'मैदानावर चांगली कामगिरी करण्यासाठी घट्ट मैत्री असणे आवश्यक नाही. ते व्यावसायिक खेळाडू आहेत. त्यांना त्यांचं काम माहिती आहे. एका टीमकडून खेळायचं आहे याचा अर्थ रोज एकत्र डिनर करावा असा नाही. मी खेळत होतो त्यावेळी माझेही टीममध्ये सर्व मित्र नव्हते. त्याचा माझ्या कामगिरीवर काही परिणाम झाला नाही. ते परिपक्व आहेत. त्यांच्यावर मॅच जिंकण्याची जबाबदारी आहे, हे त्यांना माहिती आहे.' असं गंभीरनं सांगितलं.

काय होते प्रकरण?

मागच्या वर्षी जानेवारी महिन्यात सय्यद मुश्ताक अली टी-20 ट्रॉफीमध्ये (Sayed Mushtaq Ali Trophy) बडोद्याच्या पहिल्या सामन्याआधी दीपक हुड्डाचं कर्णधार कृणाल पांड्यासोबत (Krunal Pandya) भांडण झालं. यानंतर दीपक हुड्डा बायो-बबल सोडून निघून गेला. वादानंतर दीपक हुड्डाने बडोदा क्रिकेट असोसिएशनला पत्र लिहिलं आणि कर्णधार कृणाल पांड्यावर शिव्या दिल्याचे आणि करियर बरबाद केल्याचे आरोप केले. बडोदा क्रिकेट असोसिएशनने मात्र हुड्डाची ही वर्तणूक शिस्तभंग असल्याचं सांगत त्याचं संपूर्ण मोसमासाठी निलंबन केलं.

बडोद्यानं निलंबन केल्यानंतर हुड्डानं राजस्थानकडून क्रिकेट खेळण्यास सुरूवात केली. त्यानंतर त्याची वेस्ट इंडिज विरुद्धच्या सीरिजमध्ये निवड झाली होती. टीम इंडियाकडून समाधानकारक कामगिरी केलेल्या हुड्डाला लखनऊ सुपर जायंट्सनं (Lucknow Super Giants) 5 कोटी 75 लाखांना खरेदी केले.

IPL 2022 : 'BCCI चा तो नियम मूर्खपणाचा', नवी इनिंग सुरू होताच शास्त्रींचा सिक्सर

विशेष म्हणजे हुड्डानंतर लखनऊनं कृणाल पांड्याला 8 कोटी 25 लाख रूपयांना खरेदी केले. त्यामुळे एकमेकांचा चेहराही न बघणारे हुड्डा आणि कृणाल आता एकाच आयपीएल टीममध्ये खेळणार आहेत.