Google: 16 वर्ष जुनी सर्विस होणार बंद, पाहा तुमच्यावर कसा होणार परिणाम

Google Bookmarks ही 16 वर्ष जुनी आणि फारशी लोकप्रिय नसलेली सुविधा आता सर्व युजर्ससाठी बंद होणार आहे. 30 सप्टेंबर 2021 पासून याची अंमलबजावणी होणार असून त्याबाबतची सूचना गुगलने बुकमार्क्स पेजवरील बॅनरच्या माध्यमातून दिली आहे.

बुकमार्क्ससवरील सर्व डेटा गुगलने युजर्सला एक्सपोर्ट (Export) करायला सांगितला आहे. यासाठी युजर्सने google.com/bookmarks वर जात Export Bookmarks वर क्लिक करावं. त्यानंतर युजर आपला डेटा कॉपी करु शकणार आहे. ही सुविधा बंद होणार असल्याने त्याचा परिणाम गुगल मॅप्सवर (Google Maps) होण्याची शक्यता आहे.

गुगल बुकमार्क्स बंद झाल्यावर गुगल मॅप्सवरील काही फीचर्सबाबत अडचणी उदभवण्याची शक्यता नाकारता येत नाही. कारण हे फीचर बुकमार्क्सशी संबंधित आणि सिंक आहेत.

गुगल मॅप्सवर युजर्स आपल्या आवडत्या ठिकाणांचा डेटा एका लिस्टमध्ये एकत्रित ठेवू शकतो आणि नंतर तो पडताळू शकतो. जर एखाद्या वेबसाईटवर गुगल मॅप्स वर एम्बेडेड मॅप्स (Embedded Maps) असेल तर युजर तो गुगल मॅप्सवर सेव्ह करु शकतो.

यासाठी त्या वेबसाईटवर क्लिक करुन तुम्हाला हव्या असलेल्या ठिकाणाची माहिती मिळवण्यासाठी मॅपवरील त्या ठिकाणावर क्लिक करावं आणि त्यानंतर सेव्हवर क्लिक करुन लिस्ट निवडावी. तुम्हाला स्टार आणि वेबसाइटचे नाव तुमच्या डेस्कटॉप किंवा मोबाईलवर दिसू लागेल.