बापलेकाची कसोटीत कमाल! मुलाने द्विशतक झळकावताच झाला विश्वविक्रम

वेस्ट इंडिज आणि झिम्बॉब्वे यांच्यात दोन कसोटी सामन्यांची मालिका सुरू आहे. या मालिकेतील पहिल्या सामन्यात वेस्ट इंडिजचा माजी दिग्गज फलंदाज शिवनारायण चंद्रपॉलच्या मुलाने नाबाद द्विशतक झळकावलं.

तेगनारायण आणि शिवनारायण या बापलेकाच्या नावावर विश्वविक्रम नोंद झाला. तेगनारायण चंद्रपॉलने झिम्बॉब्वेच्या गोलंदाजीचा समाचार घेत ४६५ चेंडूत नाबाद २०७ धावा केल्या. या खेळीत त्याने १६ चौकार आणि ३ षटकार मारले.

तेगनारायणचे वडील शिवनारायणने मार्च २००५ मध्ये दक्षिण आफ्रिकेविरुद्ध पहिल्या डावात नाबाद २०३ धावा केल्या होत्या. आता त्यांच्याच पावलावर पाऊल टाकत तेगनारायणने द्विशतक केलं.

तेगनारायणने त्याच्या कसोटी कारकिर्दीतील तिसऱ्या सामन्यात ही कामगिरी केलीय. विशेष म्हणजे त्याचं हे पहिलंच शतक होतं. अशी कामगिरी करणारा तो वेस्ट इंडिजचा तिसरा फलंदाज ठरलाय.

शिवनारायण आणि तेगनारायण या बापलेकांनी त्यांचं द्विशतक अनोख्या पद्धतीने पूर्ण केलं. शिवनारायण यांनी चौकार मारत तर तेगनारायणने षटकार मारत २०० धावा पूर्ण केल्या.

तेगनारायणने आतापर्यंत ५ डाव खेळले असून यात द्विशतक केलंय. तर शिवनारायण यांना पहिल्या कसोटी शतकासाठी ८ वर्षे ५२ डाव खेळावे लागले होते. चंद्रपॉल यांनी कसोटीत १६४ सामने खेळताना ११८६७ धावा केल्या होत्या. यात ३० शतकांचा समावेश आहे.