Petrol Diesel च्या किमतींनी का गाठली शंभरी, जाणून घ्या PHOTOS च्या माध्यमातून
देशात गेल्या काही दिवसांपासून पेट्रोल (Petrol Price) आणि डिझेलच्या (Diesel Price) किमती सातत्यानं वाढत आहेत. देशातील अनेक राज्यात पेट्रोलच्या दरांनी शतक गाठलं आहे. इतकंच नाही तर राज्यातही अनेक जिल्ह्यांमध्ये पेट्रोल शंभरीच्या जवळपास असल्याचं चित्र आहे. अशात परिस्थिती सामान्य नागरिकांना मोठा फटका बसत असून पेट्रोल डिझेलचे दर इतके का वाढले, असा प्रश्न अनेकांना पडत आहे.
आंतरराष्ट्रीय बाजारातील इंधनाच्या किमती आणि केंद्र तसंच राज्य सरकारकडून लादले जाणारे कर या दोन प्रमुख घटकांमुळे पेट्रोल, डिझेलचे दर वाढले आहेत. राज्य सरकारांनी मूल्यवर्धित करांमध्ये वाढ केली आहे. तर, कोरोनाचा प्रादुर्भाव रोखण्यासाठी करण्यात आलेल्या लॉकडाऊनमुळे केंद्र आणि राज्यांचा महसूल घटला. महसुली तूट भरून काढण्यासाठी केंद्रानं पेट्रोलवरील उत्पादन शुल्क १९.९८ रुपये प्रति लिटरवरून ३२.९८ रुपयांवर नेले. तर डिझेलवरील उत्पादन शुल्क १५.८३ रुपयांवरून ३१.८३ रुपयांपर्यंत वाढवलं.
वास्तवात पाहायला गेल्यास असं लक्षात येतं, की पेट्रोल, डिझेलचा दर कमी आहे. मात्र त्यापेक्षा त्यावरील करांचं प्रमाण जास्त आहे. वाहतूक खर्च, डीलरचं कमिशन, केंद्राकडून आकारण्यात येणारं उत्पादन शुल्क आणि व्हॅट यांच्यामुळे पेट्रोल, डिझेलच्या दरात वाढ होते. दिल्लीत पेट्रोलच्या दरातील करांचा वाटा ६० टक्के आहे. तर डिझेलच्या बाबतीत हे प्रमाण ५५ टक्के आहे.
ग्लोबल पेट्रोल प्राईजेस डॉट कॉमच्या माहितीनुसार, १५ फेब्रुवारीला श्रीलंकेत पेट्रोलचा दर ६०.२९ रुपये इतका होता. नेपाळमध्ये पेट्रोलची किंमत ६९.०१ रुपये, पाकिस्तानात ५१.१२ रुपये, बांग्लादेशात ७६.४३ रुपये होती. शेजारी देशांमध्ये डिझेलदेखील स्वस्त आहे. श्रीलंकेत ३८.९१ रुपये, नेपाळमध्ये ५८.३२, पाकिस्तानात ५३.०२, बांग्लादेशात ५५.७८ रुपयांनी डिझेल विकलं जातं.