Home /News /news /

साहेब, तुमचा वाघ गेला हो! अन् राज ठाकरे झाले स्तब्ध, कॉल रेकॉर्डचा VIDEO व्हायरल

साहेब, तुमचा वाघ गेला हो! अन् राज ठाकरे झाले स्तब्ध, कॉल रेकॉर्डचा VIDEO व्हायरल

राज ठाकरे यांनी सुनिल ईरावार याच्या कुटुंबीयांचे सांत्वन करण्यासाठी फोन केला होता.

    मुजीब शेख, प्रतिनिधी नांदेड, 18 ऑगस्ट : मनसेचे अध्यक्ष राज ठाकरे यांच्यावर जीवापाड प्रेम करणारा सच्चा आणि कट्टर कार्यकर्ता असलेल्या सुनिल ईरावार याने दोन दिवसांपूर्वी आत्महत्या केली. सुनिलच्या जाण्यामुळे मनसेवर शोककळा पसरली आहे. राज ठाकरे यांनी जेव्हा सुनिलच्या कुटुंबीयांचा सांत्वन करण्यासाठी फोन केला तेव्हा आक्रोश ऐकून तेही स्तब्ध झाले. नांदेड जिल्ह्यातील  किनवट इथं राहणाऱ्या सुनिल ईरावार याने राहत्या घरात गळफास घेऊन आत्महत्या केली होती. सुनिलने आत्महत्येपूर्वी सुसाईड नोट लिहिली होती. यात त्याने 'राजसाहेब मला माफ करा' असं म्हणत जीवन यात्रा संपवली. राज ठाकरे यांनी ईरावार कुटुंबीयांचे सांत्वन करण्यासाठी फोन केला होता. सुनिलच्या भावाने हा फोन उचलला होता. 'जय महाराष्ट्र, मी, राज ठाकरे बोलतोय' असं म्हणताच फोन पलिकडून बोलणाऱ्या भावाने 'साहेब, तुमचा वाघ गेला हो, खूप प्रेम करायचा तुमच्यावर' असं म्हणून एकच आक्रोश केला. हे ऐकून राज ठाकरेही काही काळ स्तब्ध झाले. राज ठाकरे यांनी सुनिलच्या जाण्याबद्दल दु:ख व्यक्त केले. सुनिलने इतक्या टोकाचे पाऊल का उचलले, निदान काही करण्याआधी माझ्याशी तरी बोलायचे, अशी विचापूस केली. तसंच लॉकडाउनचा काळ आहे, सध्या सर्वांनी काळजी घ्यावी, एकदा सर्वकाही सुरळीत झाले की, भेट द्यायला येईल, असं आश्वासनही राज यांनी दिले. राज ठाकरे यांनी सुनिलच्या आत्महत्येनंतर सर्व मनसे कार्यकर्त्यांनी धीर देण्यासाठी एक पत्रकही प्रसिद्ध केले होते. पोस्टमध्ये राज ठाकरे म्हणाले की, 'पैसे आणि जात ह्यांच्या दलदलीत अडकलेलं निवडणुकीचं राजकारण बदलायचं आहे आणि म्हणूनच गेले १४ वर्ष आपण हा संघर्ष करतोय. पण हा संघर्ष सोपा नाही, प्रवाहाच्या उलट पोहणाऱ्याची सगळ्यात जास्त दमछाक होते पण त्यासाठी माझी तयारी आहे आणि तुमची देखील. संघर्षाची भीती मला कधीच वाटली नाही, उलट तो मला माझा सोबती वाटत आला आहे. संघर्ष आला की चढ-उतार हे येणारच. पण चढ आला म्हणून हुरळून जायचं नाही वा उतार आला म्हणून विचलित व्हायचं नाही, हे मी शिकलो. पण ह्या संघर्षात माझा एखादा सहकारी कोलमडून पडतो तेंव्हा मात्र मन अस्वस्थतेने घेरून जातं. सुनील ईरावार आपल्या नांदेडच्या सहकाऱ्याने आत्महत्या केली आणि ती करताना त्याने लिहिलंय की 'साहेब जात आणि पैसा हे दोन्हीही माझ्याकडे नाही. त्यामुळे राजकारण करणं ह्या पुढे मला शक्य नाही. म्हणून मी माझं जीवन संपवत आहे, राजसाहेब मला माफ करा.' अरे बाबांनो, जात आणि पैश्यात अडकलेलं राजकारण तर आपल्याला बदलायचं आहे म्हणूनच ९ मार्च २००६ ला आपण ‘महाराष्ट्र नवनिर्माण सेना’ हा पक्ष सुरु केला. नवनिर्माणाच्या आपल्या ह्या लढ्यात आपल्याला पैसे आणि जात ह्यांच्या दलदलीत अडकलेलं निवडणुकीचं राजकारण बदलायचं आहे आणि म्हणूनच गेले १४ वर्ष आपण हा संघर्ष करतोय. पण हा संघर्ष सोपा नाही, प्रवाहाच्या उलट पोहणाऱ्याची सगळ्यात जास्त दमछाक होते पण त्यासाठी माझी तयारी आहे आणि तुमची देखील. म्हणूनच इतक्या चढ उतारांच्या नंतर देखील तुमची आपल्या ध्येयावरची निष्ठा ढळली नाही. मी ह्या आधी देखील सांगत आलो आहे आणि आत्ता पुन्हा सांगतो, हा या जातीचा... त्या मतदार संघात अमुक जातीची इतकी मतं आहेत... ह्या उमेदवाराकडे पैसा ओतायची इतकी ताकद आहे... असल्या गोष्टीत मला स्वारस्य नाही, मला माझ्या पक्षाचं राजकारण असल्या गोष्टींवर चालवायचं नाही, यश जेंव्हा यायचं असेल तेंव्हा येईल. त्यासाठी मी माझी तत्व सोडणार नाही आणि तुम्ही धीर सोडू नका. तुम्ही खचलात, उन्मळून पडलात तर लक्षात ठेवा त्याचा सगळ्यात जास्त त्रास मला होईल. सुनील ईरावरला महाराष्ट्र नवनिर्माण सेनेतर्फे मी श्रद्धांजली अर्पण करतो, आणि तुम्हा सगळ्यांना हात जोडून विनंती करतो की माझ्या कुठल्याही सहकाऱ्याला अशी श्रद्धांजली वाहण्याची वेळ माझ्यावर येऊ देऊ नका. महाराष्ट्र नवनिर्माण सेना हे कुटुंब आहे. त्यामुळे कधीही मन उदास झालं तर एकमेकांशी बोला, लढाई कठीण असली तरी अंतिम विजय आपलाच आहे हे विसरू नका. कोरोनामुळे उद्भवलेली परिस्थिती कठीण आहे, ह्या काळात स्वतःची आणि स्वतःच्या कुटुंबीयांची काळजी घ्या.' असं आवाहन राज ठाकरेंनी केलं होतं.
    Published by:sachin Salve
    First published:

    Tags: MNS

    पुढील बातम्या