बाप-लेकाचा विहिरीत बुडून दुर्देवी मृत्यू; आईच्या प्रसंगावधानाने दुसऱ्या मुलाचा जीव वाचला

परळी, 14 मे : बीड जिल्ह्यातील परळी येथील (Parli Beed) बरकतनगरमध्ये एक धक्कादायक बातमी समोर आली आहे. वडील आणि मुलाचा विहिरीत बुडून मृत्यू झाल्याची घटना घडली आहे. वडील विहिरीवर पाणी आणायला गेले असता ते विहिरीत पडले आणि बुडाले. त्यावेळी तिथे उपस्थित मुलगाही त्यांनी वाचवताना बुडाला. (Father and Son Drowned) यानंतर दुसऱ्या मुलाने या दोघांना वाचवण्यासाठी उडी घेतली असताना तोही बुडत होता. यादरम्यान त्याच्या आईने दोरी फेकून वाचवले.

शेख सादिक शेख हमीद असे मृत वडिलांचे (वय 58) तर शेख रफिक शेख सादीक (वय 25) असे मुलाचे नाव आहे. ही घटना सायंकाळी 6 वाजेच्या सुमारास घडली. या घटनेने परिसरात हळहळ व्यक्त केली जात आहे.

नेमकं काय घडलं?

परळी शहराजवळील दादाहरी वडगाव शिवारातील शेख सादिक शेख हमीद (वय 58) विहिरीवर पाणी आणण्यासाठी गेले असता पाय घसरुन विहिरीत पडले. त्यांना काढण्यासाठी त्यांचा मुलगा शेख रफिक शेख सादीक (वय 25) याने विहिरीत उडी मारली. एकमेकांना वाचवण्याच्या प्रयत्नात दोघेही बुडाले. दोघांना वाचवण्यासाठी तिसरा मुलगा शेख साजिद शेख सादिक (वय 30) हा देखील विहिरीत उतरला. मात्र, तोही बुडत असल्याने आई शेख शौकत शेख सादिक हिने दोर टाकून हाताला धरून एका मुलाला वाचवले.

हेही वाचा - व्हिडिओ कॉलवर कोणासोबत बोलतीये? प्रश्न विचारताच भडकली पत्नी, पतीची केली भयानक अवस्था