)
आशीष कुमार, प्रतिनिधी पश्चिम चम्पारण, 6 जून : आपल्या देशात एकापेक्षा एक जुगाडू लोक आहेत. वेगवेगळ्या प्रकारच्या जुगाडातून लोक काहीही बनवून टाकतात. आता असेच काहीसे बिहारच्या बेतियामध्ये पाहायला मिळाले आहे. याठिकाणी एका व्यावसायिकाने दुचाकीवरच पिठाची गिरणी बसवली आहे. विशेष म्हणजे हे केल्यानंतर आता तो घरोघरी जाऊन हरभरा आणि गहू दळतो. तसेच या माध्यमातून उदरनिर्वाह करतो. आश्चर्याची बाब म्हणजे हा व्यक्ती दररोज 50 किलोमीटरचा प्रवास करतो. दुचाकीवर छोटी पिठाची गिरणी लावून घरोघरी हरबरा दळणाऱ्या दिनेशने सांगितले की, दोन वर्षांपूर्वी ही कल्पना त्याच्या मनात आली. त्याने त्याच्या दुचाकीवर एक लहान आकाराचा ग्राइंडर बसवला आहे, तो चालवण्यासाठी पेट्रोलवर चालणारा मिनी जनरेटरही बसवला आहे.
जनरेटरमध्ये 1 लिटर पेट्रोल टाकल्यास ते सुमारे 50 किलो हरबरा दळू शकतो. दिनेशच्या म्हणण्यानुसार, त्याला एक किलो वस्तू दळण्यासाठी 12 रुपये नफा मिळतो. विशेष म्हणजे या कामाचा त्याला इतका आनंद मिळतो की तो या दुचाकीवर फिरत रोज 50 किमीचा प्रवास करतो. दुचाकीवर चालणाऱ्या या स्पेशल गिरणीचे वैशिष्ट्य म्हणजे ते तुमच्या डोळ्यासमोर हरभरा किंवा गहू दळतो. त्यात ना भेसळीची चिंता आहे ना खराब दळण्याची. लक्षात घेण्यासारखी गोष्ट म्हणजे, बाजारात बेसनपीठची किंमत 150 रुपये किलो आहे, परंतु जर तुम्ही हरबरा दळून घेतला तर तो फक्त 100 रुपये किलोने मिळेल. चंपारणचे डझनभर व्यापारी या जुगाडाच्या जोरावर आपला उदरनिर्वाह चांगल्या पद्धतीने करत आहेत.
+6
फोटो
