Uttarakhand Exit Polls : उत्तराखंडचा पुन्हा भाजपला कौल, Times Now VETO पोलमध्ये बहुमत

मुंबई, 7 मार्च : 5 राज्यांमध्ये मतदानचे टप्पे पूर्ण झाल्यानंतर (Assembly Election 2022) आता एक्झिट पोल (Exit Poll) यायला सुरूवात झाली आहे. टाईम्स नाऊ आणि आणि व्हिटोच्या (Times Now Veto Exit Poll) सर्व्हेनुसार उत्तराखंडमध्ये भाजपला बहुमत मिळत आहे. उत्तराखंडच्या 70 जागांपैकी 37 जागांवर भाजपचा विजय होईल, तर काँग्रेसला 31 जागांवर यश मिळेल. आपला 1 आणि इतरांना एका जागेवर समाधान मानावं लागेल, असा अंदाज टाईम्स नाऊ आणि व्हिटोच्या एक्झिट पोलमध्ये मांडण्यात आला आहे. उत्तराखंडमध्ये 70 जागांसाठी 14 फेब्रुवारीला मतदान झालं होतं. मतदान पूर्ण झाल्यानंतरही इतर चार राज्यांमध्ये निवडणुका असल्यामुळे आयोगाने एक्झिट पोल देण्यावर बंदी घातली होती. 7 मार्चला उत्तर प्रदेशमध्ये शेवटच्या टप्प्याचं मदतान पार पडल्यानंतर एक्झिट पोल घ्यायला निवडणूक आयोगाने परवानगी दिली आहे. उत्तर प्रदेश, उत्तराखंड, पंजाब, गोवा आणि मणिपूरमध्ये या पाच राज्यांच्या निवडणुका म्हणजे 2024 लोकसभा निवडणुकीची सेमी फायनल मानली जात आहे. Uttarakhand Exit Polls : पहिल्याच एक्झिट पोलमध्ये भाजपला धक्का, ABP C-Voter च्या पोलमध्ये काँग्रेसची मुसंडी उत्तराखंडमध्ये कोणत्याच पक्षाने मुख्यमंत्रीपदाचा चेहरा दिला नव्हता, तरी भाजपने नेतृत्वाची जबाबदारी मुख्यमंत्री पुष्कर सिंग धामी तर काँग्रेसने माजी मुख्यमंत्री हरीश रावत आणि आपने अजय कोठियाल यांना दिली होती. 10 मार्चला या पाचही राज्यांच्या निवडणुकांचे निकाल जाहीर होणार आहेत. 2017 साली भाजपने 70 पैकी 57 जागा जिंकल्या होत्या, तर काँग्रेसला 11 आणि इतर पक्षांना 2 जागा जिंकता आल्या होत्या. एवढ्या मोठ्या प्रमाणावर यश मिळूनही भाजपला उत्तराखंडमध्ये मागच्या वर्षी चार महिन्यात तीनवेळा मुख्यमंत्री बदलावे लागले होते. 4 वर्ष त्रिवेंद्रसिंग रावत उत्तराखंडचे मुख्यमंत्री होते, पण पक्षांतर्गत नाराजीमुळे रावत यांच्याऐवजी तिरथसिंग रावत यांना मुख्यमंत्री केलं. कोरोना व्हायरसमुळे निवडणूक आयोगाने पोटनिवडणुकांवर बंदी घातली होती, त्यामुळे तिरथसिंग रावत मुख्यमंत्री झाल्यानंतर पुढच्या 6 महिन्यात त्यांना विधानसभेचं सदस्य होणं शक्य नव्हतं, त्यामुळे तिरथसिंग यांना राजीनामा द्यावा लागला. तिरथसिंग रावत यांच्यानंतर पुष्कर सिंग धामी यांना भाजपने उत्तराखंडचं मुख्यमंत्री केलं. 10 मार्च ते 4 जुलै या 4 महिन्यांच्या काळात भाजपला उत्तराखंडमध्ये 3 मुख्यमंत्री बदलावे लागले.

• Follow us on